Azərbaycanın 20 yaşadək futbolçulardan ibarət milli komandasının (U-20) yeni baş məşqçisi Ruy Jorj ictimaiyyətə təqdim olunub.

Prosport.Az xəbər verir ki, bu münasibətlə keçirilən mətbuat konfransında portuqaliyalı mütəxəssisin təyinatının detalları açıqlanıb. Onunla 1,7 illik müqavilə imzalanıb.

AFFA-nın icraçı vitse-prezidenti Sərxan Hacıyev bildirib ki, onun məşqçilər korpusunda 2 portuqaliyalı köməkçisi olacaq: “Həmçinin yerli məşqçi də yığmada fəaliyyət göstərəcək. Hazırda bu barədə ətraflı məlumat verə bilmirik. Yaxın vaxtlarda həmin məşqçinin kimliyi açıqlanacaq”.

Qeyd edək ki, Ruy Jorj məşqçiliyə futbolçu kimi son klubu olan “Belenenseş”də başlayıb. Portuqaliyalı mütəxəssis 2006-2010-cu illərdə həmin klubun U-19 komandasına rəhbərlik edib, 2008/2009-cu illər mövsümündə qısa müddət əsas komandanın baş məşqçisi olub.

2010-cu ildə Portuqaliyanın U-21 yığmasının sükanı arxasına gətirilən Ruy Jorj 15 il bu komandanı çalışdırıb. Onun rəhbərliyi altında portuqaliyalılar 5 dəfə Avropa çempionatının final mərhələsində iştirak edib, bunun 2-də (2015, 2021) gümüş mükafat qazanıb. Həmin illər ərzində Ruy Jorj Portuqaliyanın olimpiya millisinə də rəhbərlik edib.