Yuxarıdakı fikir sizə ciddi gəlməsin. Aşağıdakı şəklə baxmaq kifayətdir ki, fikrimin ironiya və ya sarkazmla dolu olduğu anlaşılsın.

Bu gün "Neftçi"nin asan oyunlarının başa çatdığını yazmaq istəyirdim. Qış fasiləsindən sonra təqvim əməlli-başlı "Neftçi"nin xeyrinə işləyirdi. Yeni baş məşqçi gəlişindən sonra özünə bənzəməyən "Araz-Naxçıvan"a 4 qol vurmaq, autsayderlər zonasında olan "Qəbələ"ni çətinliklə məğlub etmək (fasilədən sonra "Qəbələ"nin üstün oynadığını unutmayaq) və "Gəncə səbəti", Ohori kimi söhbətlərlə "Kəpəz"ə qalib gəlmək hələ "Neftçi"nin özünə gəldiyini və ya başqa dillə desəm, Yuri Vernidubun bu xaosdan baş çıxardığını deməyə əsas vermirdi. Bunu kim ki deyirdi, demək ki, futbol anlayışı "Neftçi"yə azarkeşlik səviyyəsində idi və mən o insanları ciddiyə almaq fikrindən uzağam.

Düzdür, bir para insanlar peyda olacaq ki, "Şamaxı"nın vurduğu penaltinin qol olmadığını iddia etsin. Belə tip iddialar həmişə olub, olacaq da. Necə ki bir qrup insanlar "Sabah"ı dartırlar" kimi iddialarla fikir formalaşdırmağa çalışır. Kimsə hansısa maraqlar üzündən bunu iddia edir, kimisə də "Neftçi" azarkeşidir. Şəxsən 2-cilər daha səmimidir və onlara deyiləcək sözüm yoxdur.

Penalti iddiasında olanlar üçün 6 ay əvvəl tərəflərin Bakıda keçirilmiş ilk oyununu göstərə bilərəm. İlk hissədə Emin Mahmudovun vurduğu penaltiyə baxın. 43-cü dəqiqədə Eminin vurduğu top "Şamaxı"nın braziliyalı mərkəz müdafiəçisi Davidin əlinə dəyir. Elçin Məsiyev penalti qərarını verir. Bax, həmin penalti necə penaltidirsə, bu da o cür penaltidir!

"Neftçi"nin çətin oyunları isə bundan sonra başlayır. Yaxşı ki, fevralın 21-də "Qarabağ"la oyun yuxarıların təzyiqi ilə təxirə salınıb. Yoxsa, əmin idim ki, prinsipial Qurban Qurbanov 2-ci heyətlə belə, bu "Neftçi"ni bağışlamayacaq. Yaxşı ki belə oldu. Ən azından məğlubedilməzlik seriyası məchul vaxta kimi uzanmış oldu.

Əslində məchul dediyim vaxt uzaqda deyil. "Neftçi"nin təqviminə baxmaq kifayətdir ki, komandanın bu matçlarda xalsız qalacağını proqnozlaşdıraq. Bəlkə elə növbəti tur? Axı, yaxşı futbol göstərməyən, ancaq nəticəyə oynayan "Turan Tovuz" avrokuboklar üçün 3-cü pilləni əldən vermək istəmir. Və yaxud olsun "Qəbələ" və "İmişli" ilə matçlar. "Qəbələ" özünə gəlib və bu dəfə çətin ki "Neftçi" qapısı önündə yaratdığı şansları boşa versin. "İmişli" isə "Şamaxı" kimi "Neftçi"nin hələ ki yenə bilmədiyi komandaların başında gəlir.

Bizi maraqlı proseslər gözləyir. Yaşayaq, görək...

Mahmud