"Gəncə" basketbol üzrə Azərbaycan Kubokunun finalında "Sabah"a 89:82 hesabı ilə qalib gəlib.

Prosport.Az xəbər verir ki, matçdan sonra hər iki mütəxəssis nəticəni şərh edib:

Rimas Kurtinaytis ("Sabah"): "Üstünlüyümüzü əldən verdik. Bəzi epizodlarda konsentrasiyanı itirdik. 30 dəqiqə oyuna nəzarət bizdə idi. 4-cü period isə ağır alındı. Qələbəmizə tez inandıq. "Gəncə"ni təbrik edirəm. Bizimlə oyuna yaxşı hazırlaşmışdılar".

Halil Atlı ("Gəncə"): "Ardıcıl 2 mövsüm kubokda final oynadıq. Bu, uğurdur. Daha öncə də "Gəncə" titulu qazanıb. Kubok yenə Gəncəyə gəlir, bunu bacardıq. Çox xoşbəxtik. Daha əvvəl də söylədiyim kimi, belə oyunlarda kim qələbə qazanmaq üçün daha çox istəkli olursa da, o da qalib gəlir. Çünki buna bir dəfə haqqın var. Komandamız əvvəldən sona kimi uğura inandı. "Neftçi" ilə çətin oyun keçirdik, "Şəki" önündə üstün olduq. Final oynamağa haqq qazandıq. Bu gün də yüksək büdcəli, səviyyəli rəqibi məğlub edərək kuboku əldə etdik. Hamını təbrik edirəm. Basketbolçular verilən tapşırıqları yerinə yetirdilər, oyuna kökləndilər, meydanda əla reaksiya verdilər. Məğlub edilməsi çətin görünən komandaya qalib gəldik. Bu kuboku Gəncəyə, gəncəlilərə həsr edirik. Klub rəhbərliyinə təşəkkür edirəm. İlk gündən dəstək oldular. Hər mövzuda, hər addımda yanımızda oldular. Bu kubokda onların da zəhməti var. Bütün diqqətimizi çempionata yönəldəcəyik. Az vaxtımız qaldı. Liqanı ən yaxşı şəkildə tamamlamaq istəyirik".