"Absheron Layns" Azərbaycan Basketbol Liqasının XVII turunda səfərdə "Gəncə"yə 81:71 hesabı ilə qlib gəlib.

Prosport.Az xəbər verir ki, oyundan sonra hər iki komandanın baş məşqçisi fikirlərini bölüşüb:

Ərhan Tokər ("Abşeron Layns"): "Qələbə qazandığımız üçün sevincliyəm. Oyunçularımı təbrik edirəm. Çox yaxşı mübarizə apardılar. Yaxşı müdafiə olunduğumuz bir qarşılaşma oldu. Hətta hakimlər bir qədər sərt oyuna icazə versəydilər, rəqib daha az xal qazanacaqdı. Bir oyunçumuz vaxtından tez oyunu tərk etdi. Çünki qarşı tərəf bizi təxribata çəkməyə çalışırdı. Məhz bunun nəticəsində də texniki foullar alındı. Sonradan 2 tərəf də sakitləşdi. Buna baxmayaraq, yenə də basketbolçularımıza qarşı qıcıq yaradacaq hərəkətlər oldu. Bunlara rəğmən sona qədər istədiyimiz nəticəni qoruyub saxlaya bildik. Basketbol belə oyundur. Oyunçular bəzən bir-birinə qarşı sərt, kobud və xoşagəlməz davranışlarla yadda qalırlar. Qələbə üçün sevinsəm də, belə durumlar üçün üzülürəm. Belə olmasını istəmirəm. Parketdə əsl mübarizənin olmasını və layiqli tərəfin qələbə qazanmasını istəyirəm".

Halil Atlı ("Gəncə"): "Əvvəlcə rəqib komandanı qələbə münasibətilə təbrik edirəm. Yaxşı kollektivdir. Basketbolçuların ortaya qoyduğu oyun xoş sözlərə layiqdir. Onlara qarşı oynamaq bizim üçün də xoşdur. Çünki oyunboyu taktiki-texniki dəyişiklər olur, bu da basketbol adına sevindiricidir. Özümüzə gəlincə, komandamız meydanda mübarizə apardı. Uşaqlara buna görə təşəkkür etdim. Danışıb həyata keçirə bilmədiyimiz çox şey var. Hətta bəzi şeyləri sona qədər danışdığımız kimi oynaya bilmədik. Buna baxmayaraq, rəqibə daha çox xal atmağa imkan vermədik. Amma onlardan çox xal yığa bilməyəndən sonra məğlub olursan. Qarşıda kubok oyunu var, diqqətimizi buna yönəldəcəyik. Müntəzəm liqanın əsas mərhələsinin başa çatmasına daha 3 oyun var. Səhvlərimizi aradan qaldırıb, çempionatı ən yaxşı şəkildə başa vurmaq istəyirik".