AFFA-nın Apellyasiya Arbitraj Tribunalının növbəti iclası keçirilib.

Prosport.Az xəbər verir ki, yığıncaqda 2 klubun şikayətinə baxılaraq, müvafiq qərarlar qəbul edilib.

Region Liqasında çıxış edən “Xıdırlı” klubunun apellyasiya şikayəti qismən təmin edilib. Belə ki, “Xıdırlı” – “Viləş” görüşünün 45+1-ci dəqiqəsində meydan sahiblərinin futbolçusu Rəsul Hacıyev rəqibə fiziki təzyiq göstərdiyinə görə birbaşa qırmızı vərəqə alıb. Bu səbəbdən futbolçuya 3 oyun cəza verilməsi barədə qərar qüvvədə saxlanılıb. Həmin dəqiqədə klubun azarkeşləri meydana daxil olaraq rəqib oyunçulara fiziki təzyiq göstəriblər. Buna görə komandanın növbəti iki ev oyununu azarkeşsiz keçirməsi ilə bağlı qərar da qüvvədə qalıb.

Apellyasiya Arbitraj Tribunalının araşdırmaları nəticəsində müəyyən edilib ki, matç dayandırılan zaman azarkeşlərin hərəkətlərinə görə “Xıdırlı”nın birbaşa məsuliyyəti yoxdur. Bununla da, İntizam Komitəsinin “Xıdırlı”ya “Viləş”lə oyunda 0:3 hesablı texniki məğlubiyyət verilməsini nəzərdə tutan qərarı ləğv olunub. Görüşün ikinci hissəsinin yenidən və neytral stadionda keçirilməsinə qərar verilib.

Bundan başqa, “Qobu” tərəfindən verilən apellyasiya şikayəti təmin edilməyib. Komandanın futbolçusu Emin Əlicanov “Crystal”la qarşılaşmada rəqibə və hakimlərə fiziki təzyiq göstərdiyinə görə qırmızı vərəqə alıb. Bu səbəbdən futbolçuya 10 oyun cəza verilməsi barədə qərar qüvvədə saxlanılıb.