"Nigeriyaya dəvət "Obasa Games" turnirinin təşkilatçılarından gəlmişdi. Yəni azərbaycanlı məşqçimiz Etibar İbrahimova çıxmışdılar. O, ara-sıra Nigeriyada akademiyalar üçün dərslər keçirdi. Nigeriyalılar “Qarabağ”ın həm akademiya, həm də əsas komandaya dair metodologiyası ilə tanış olmaq istəyirdilər". 

Bunu Prosport.Az-a açıqlamasında "Qarabağ" FK Akademiyasının koordinatoru Aftandil Hacıyev bildirib.

44 yaşlı koordinator 11-18 dekabrda Nigeriyanın paytaxtı Laqosda olub. O, Nigeriya səfəri barədə bunları bildirib:

"Məşqçilərlə və rəhbərliklə görüş oldu. 2 gün turnirdə yarımfinal və final oyunlarına baxdım. Finaldan sonra da bir çox komandanın iştirakı ilə seleksiya xarakterli oyunlar oldu. Məqsəd həm "Qarabağ" haqda təcrübələrimizi bölüşmək, həm də oradakı istedadlı gəncləri izləyib, imkan daxilində Azərbaycana dəvət etmək idi. Ümumilikdə 14 komandanın haradasa 400-ə yaxın futbolçusunu izlədik. Aralarından 25-26 nəfəri seçdik və onların arasında ikitərəfli oyun keçirdik. Buradan da 8 nəfəri seçdik və onları 19 yaşadək komandamıza (U-19) götürmək niyyətimiz var. Çünki 16-17 yaşlı futbolçulardır. Bəyəndiyimiz futbolçular sırf mərkəz hücumçusu istisna olmaqla, demək olar ki, hər mövqedə çıxış edə bilir. Bunların arasında vingerlər (cinah hücumçuları – red.) də var. Ola bilsin ki, qışda həmin futbolçulardan 1-2-ni heyətimizə cəlb etdik. Ümumi götürdükdə Nigeriya səfəri səmərəli oldu. Gələcəkdə də belə əməkdaşlıq ola bilər".

Qeyd edək ki, Laqos Ştat spikeri Mudaşiru Obasanın şərəfinə keçirilmiş Obasa Oyunları 17 noyabr – 13 dekabr tarixlərində keçirilib. Burada boks, futbol, şahmat, skrabl (stolüstü oyun), tennis, stolüstü tennis və atletika üzrə U-15 və U-18 yaş kateqoriyaları üzrə yarışlar baş tutub.

Səbuhi Musa