"Sumqayıt" Azərbaycan Basketbol Liqasının XI turunda "Lənkəran"a 99:95 hesabı ilə qalib gəlib.

Prosport.Az xəbər verir ki, hər iki komandanın baş məşqçisi qarşılaşma ilə bağlı fikirlərini bölüşüb.

Vadim Kuramşın ("Sumqayıt"): "Bütün komandama minnətdarlığımı bildirirəm. Uşaqlar bu gün sona qədər döyüşdülər. Hərçənd hesabda böyük xal fərqilə geridə olsaq da, sonda nəticəni xeyrimizə dəyişə bildik. Çox danışmaq istəmirəm: bu, Yeni il bayramı ərəfəsində komandamız və Sumqayıt şəhəri üçün böyük hədiyyədir. Yeri gəlmişkən, bu gün 44 xal toplayan oyun qurucumuz Keon Klerqot zədəli halda oynadı. Hətta elə bilirdim ki, ona bu gün şans verə bilməyəcəyəm. Zədəyə görə 3 gün məşqi buraxmışdı".

Qeorqi Kondruseviç ("Lənkəran"): “Sumqayıt”ı qələbə münasibəti ilə təbrik edirəm. Düşünürəm ki, sıx səfər qrafiki bu oyuna böyük təsir etdi. Biz bu matçı qazana bilərdik, lakin ehtimal ki, “Ordu” ilə oyundan sonra yol amili təsirini göstərdi. Həmin oyunu cümə günü saat 20:00-da Bakıda keçirdik, sonra Lənkərana qayıtdıq və bu gün yenidən Sumqayıta yola düşdük. Yolun təsiri matçın sonluğunda hiss olunmuş ola bilər. Boş yerdə səhvlər oldu. Bu, üzücüdür, amma komanda çalışdı, bunu görməmək mümkün deyil. Mən mübarizəyə görə basketbolçularıma təşəkkür edirəm. Hər şey komandadan asılıdır. Əgər hər oyuna bu cür yanaşsaq, düşünürəm ki, qələbələr də gələcək”.