Azərbaycanda oynayan 2 legioner futbolçu deportasiya olunub.

Prosport.Az-ın məlumatına görə, bunlar I Liqa klubunda çıxış edən Afrika əsilli Fransa vətəndaşlığı olan əcnəbi futbolçulardır.

Belə ki, bunlar "Cəbrayıl"da çıxış edən 20 yaşlı Seneqal əsilli qapıçı Matiss Morvill və 22 yaşlı sol cinah vingeri Noa Lobedir. Hər iki futbolçu sentyabrın 1-də komanda ilə müqavilə bağlamışdı və Qara Qarayev metrostansiyası yaxınlığındakı "Ruslan 93"də qalırdılar..

Onlar Dövlət Miqrasiya Xidməti tərəfindən 400 manat cərimələnib. Həmin cərimə ödənilmədiyi üçün futbolçular deportasiya olunub.

"Şahdağ Qusar"ın ötən ay transfer etdiyi 18 yaşlı qanalı Kvaku Adcey də deportasiya oluna bilərmiş. Lakin ona görə klub tərəfindən cərimə ödənilib və futbolçunun deportasiya olunmasının qarşısı alınıb. Bununla belə, futbolçunun 1 aylıq Bakıda qalma müddəti başa çatdığından, o, Qanaya qayıdıb. Bu səbəbdən futbolçu ilin son matçında "Mingəçevir"lə matçda meydanda olmayacaq.

Qeyd edək ki, "Cəbrayıl" bu gün çempionatın lideri "Şəfa"nı Şamaxıda qəbul edəcək.