"Əslində matça yaxşı başladıq. Digər 2 oyunda da belə olmuşdu. Davamını gətirə bilmirik. Təəssüf ki, fiziki olaraq hələ hazır deyilik".

Prosport.Az xəbər verir ki, bunu "Şəki"nin baş məşqçisi Bedri Meriç Azərbaycan Basketbol Liqasının III turunda "Sabah"a 66:85 hesabı ilə uduzduqları oyundan sonra  klubun mətbuat xidmətinə açıqlamasında deyib.

Türkiyəli mütəxəssis ilk hissədəki çıxışdan məmnun qaldığını bildirib: "Amma 3-cü periodda yorulduğumuz üçün hesabda çox geridə qaldıq, rəqib ribaundları aldı. Səhvləri görüb daha da hazır olmağımız lazımdır. Növbəti turda ilk ev oyunumuzda ilk qələbəmizi qazanıb hər şeyə sıfırdan başlamaq istəyirik".

O, Dorukhan Kuzunun çıxışına da toxunub: "Dorukhan "Abşeron Layns" və "Neftçi" ilə matçlarda sənədləşmə problemlərinə görə oynaya bilməmişdi. Bu gün debüt etdi. Performansından razı qaldım".

Mütəxəssis hər şeyin yoluna düşəcəyinə ümid edir: "NTD də bizim kimi qələbəsi olmayan komandadır. Amma bizim üçün bu matçın üstünlüyü var. Biz Şəkidə öz azarkeşlərimiz önündə daha yaxşı oynayırıq. İnşallah, bu həftə öz meydanımızda ilk dəfə məşqə başladıqdan sonra hər şeyin yoluna düşəcəyinə ümid edirəm".