"Şəki" klubunun yeni baş məşqçisinin adı bilinib.

Prosport.Az-ın xəbərinə görə, bu, II Liqada mübarizə aparan "Quba" komandasının baş məşqçisi Elvin Həsənovdur.

Baş məşqçi Bəhmən Həsənovu istefaya göndərən "Şəki" klubunun rəhbərliyi boş qalan posta Elvin Həsənova təklif edib. Artıq tərəflər 1+1 şərtli müqaviləyə razılaşıb.

Qeyd edək ki, yeni mövsümdən ad və loqosunu dəyişən "Şəki" klubu hazırda büdcəsinə görə I Liqaya çıxmağa ən iddialı komandalardandır. Komanda hazırda 6 xalla 6-cı sıradadır. "Şəki"nin kapitanı Cavid İmamverdiyev ötən mövsüm məhz Elvin Həsənovun rəhbərliyi altında Quba təmsilçisində çıxış edib.

Onu da bildirək ki, Elvin Həsənov uzun illər "Sabah" Akademiyasında uğurlu işi ilə yadda qalıb. O, ötən mövsümün ortasında gəldiyi "Haypers Quba"nı (indiki "Quba") I Liqaya çıxarmağa yaxın olub.