UEFA Çempionlar Liqasının Liqa mərhələsinin II turunda “Qarabağ”la oyunda zədələnən “Kopenhagen”in futbolçusu Rodriqo Ueska dünya çempionatını buraxa bilər.

Prosport.Az xəbər verir ki, bunu Danimarka klubunun baş məşqçisi Yakob Neestrup deyib.

O, matçın 15-ci dəqiqəsində əvəzlənən meksikalı müdafiəçinin zədəsinin ciddi olduğunu söyləyib. Baş məşqçinin fikrincə, 22 yaşlı oyunçunun durumuna tibbi müayinədən sonra aydınlıq gələcək: “Təəssüf ki, bu, uzunmüddətli zədə kimi görünür. Əgər qorxduğumuz kimidirsə, mənim üçün çox üzücü olacaq. Ueska əla mövsüm keçirir və gələn il Meksika yığmasının heyətində dünya çempionatında oynamağı səbirsizliklə gözləyir. İndi isə görək müayinələr nə göstərəcək”.

Qeyd edək ki, Tofiq Bəhramov adına Respublika stadionunda keçirilən oyunda “Qarabağ” 2:0 hesablı qələbə qazanıb.