"Fürsətlərdən istifadə etsəydik, hesab daha böyük ola bilərdi".

Prosport.Az xəbər verir ki, bu sözləri 16 yaşadək futbolçulardan ibarət Azərbaycan millisinin baş məşqçisi Aqil Nəbiyev deyib.

O, matçın çətin keçdiyini söyləyib: "Çətin olacağını və rəqibin aqressiv olacağını bilirdik. İki fərqli hissə izlədik. İkinci hissədə daha çox top saxladıq. Finala vəsiqə qazandıq. Rusiya və Belarus komandalarından birini gözləyirik".

A.Nəbiyev çempion olacaqlarına inanır: "AFFA rəhbərliyi yanımızdadır. İnanıram ki, finalda da yanımızda olacaq. Həmçinin azarkeşlərlə bağlı da eyni sözləri deyərdim. Artıq komanda kimi formalaşmışıq. Aramızda koordinasiya və nəticələrimiz var. Son oyunlarda qələbələr ard-arda gəlir. İnanıram ki, kuboku birlikdə götürəcəyik".

Qeyd edək ki, Azərbaycan millisi Qırğızıstanı 4:0 hesabı ilə məğlub edərək finala yüksəlib.