Misli Premyer Liqasının VI turunun “Sabah” – “Sumqayıt” matçından (1:1) sonra qonaq komandanın baş məşqçisi Saşa İliç jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə oyun və nəticəsi barədə fikirlərini bölüşüb:

“Çox çətin oyun keçdi. Əslində 1 xal qazandıq, amma hesab edirəm ki, biz keçən turda və indi xallar itirdik. Bugünkü rəqib keçən turdakı rəqibimizdən daha güclü idi”.

– Sizcə, oyunçular uzun müddət yerdə qalaraq öz komanda yoldaşlarının diqqətini pozmurdu?

– Burada qeyri-adi heç nə görmürəm. Bu, adi oyun epizodlarıdır. Belə güclü rəqiblərlə oynayanda çalışmalısan ki, əlinə düşən fürsətlərdən maksimum istifadə edəsən. Oyunçularımdan razıyam, bacardıqları hər şeyi etdilər.

– Oyundakı hakimlik barədə nə düşünürsünüz?

– O barədə danışmaq istəmirəm.

– Bu oyunda aldığınız nəticə komandanız üçün “qara zolağın” sonu sayıla bilərmi?

– Keçən iki turda, həm "İmişli”, həm də “Neftçi” ilə oyunda biz qələbəyə daha yaxın idik. Amma budəfəki oyunda “Sabah” bizdən qat-qat güclü idi. Biz hələ də çalışırıq. Elə oyunçular var ki, optimal formalarına düşməyiblər, uyğunlaşmayıblar. Heyətimizdə hələ də oyunçular baxımından bəzi problemlərimiz var. Amma biz işimizə davam edirik.