Misli Premyer Liqasının VI turunun “Neftçi” – “Karvan-Yevlax” matçından (0:0) sonra meydan sahiblərinin baş məşqçisi Samir Abasovun mətbuat konfransı keçirilib.
Prosport.Az xəbər verir ki, mütəxəssis birbaşa jurnalistlərin suallarını cavablandırıb:
– Belə bir inanc var ki, qələbədən sonra yaxşılığa doğru inam olur. “Neftçi” isə keçən həftəki qələbəsinə baxmayaraq, yenə xal itirdi. Sizcə, bu dəfə qələbəyə nə mane oldu ?
– Bu vaxta kimi bir epizod vermədən, qol vura bilməyib itirdiyimiz xallar həqiqətən üzücüdür. Bu gün daha çox üzücüdür. Son oyunlara baxsaq, bu qədər templi, dinamik oyun görməmişdim. Futbolçulardan çox razıyam. Xal itirsək də, belədir. Üzücüdür, biz daha çox üzülürük. Müdafiəyə oturmuş rəqibə qarşı oynadıq. Dərsliklərdə bu vəziyyətlərdə nə etmək tələb olunurdusa, hər şeyi etdik. Uzaqdan zərbələr, cinahlardan hücum… Arxaya oturmuş komandaya qarşı etməli olacağımız hər şeyi etdik. Bəxtsizlik… O qədər üzülürüksə, bunun izahını və cavabını tapa bilmirik. Bundan sonra da belə oynamalıyıq. Qollar gələcək. Son oyundan sonra ümidliydik ki, tilsim qırılır. O qədər epizodlara girdik. Digər oyunlara baxırıq, kornerdən ötürmə verilir, qol olur. Söz tapa bilmirəm.
– İmad Farac sanki çox mübarizəyə girmir. Aqressivliyi çatmır…
– Zədəsi var idi. Amma səbəb bu deyil. Faracı tanıyırıq, məşqlərdə xarakterli, aqressiv idi. Qayda pozmamaq qorxusu var idi. Çünki hər foul bizə tərəf olan cərimə zərbəsi ilə yekunlaşırdı. Oyunçularımız da bunu başa düşürdü. Bəlkə ona görə kontakta girmirdilər. Düşünmürəm ki, zədə problemi var.
– Bitirici “9 nömrə”niz yoxdur. Bunu hiss edirsiniz?
– Komanda ətrafında hücumçu məsələsi çox danışılır. Bütün vingerlərimiz, digər oyunçularımızın girdiyi epizodlar forvardın olmaması məsələsini kölgəyə salardı. Müdafiəçilərimiz də epizoda girdi. Təbii ki, bu problemin fərqindəyik. Buna baxmayaraq, Sambuya və Ağadadaş Salyanskiyə ümidimiz böyükdür. Komanda şəklində qollar vursaq, bu söhbətlər bitər.
– “Neftçi”yə qarşı kobud hakim səhvləri var idi. Klubun hər etirazından sonra sanki daha da üzərinə gəlinir. Hakimlərdə sizə qarşı antipatiya var…
– Bu oyunun içindəyəm. Çox üzülmüşəm. Nə cavab verəcəyimi bilmirəm. Hakimliklə bağlı 3-4 turdur danışıram
– Vensan Abubakarın transferi nə dərəcədə realdır?
– Hansı səviyyədə oyunçu olduğunu bilirsiniz. Danışıqlar getmir deyə, bir şey yoxdur. 1-2 forvard var, onlarla da danışıqlar gedir. Ümid edirik ki, söhbətlərin sonluğu yaxşı bitər. Nə deyim? Var. Söhbətlər gedir. İnsan gəlib burada müqavilə imzalamayınca, şəkili çıxmayınca, nəsə demək tezdir.
– Bu gün çox sakit görünürdünüz. Özünüzü nəticəyə hazırlamışdınız?
– Komandanın özü səbəb yaratmırdı ki, nəsə emosiya göstərim. Oyun öz ritmi ilə gedirdi. Futbolçular yaxşı futbol oynayırdı. Çılğınlığımı nə dəyişə bilərdi? Sakitçiliyin səbəbi bu idi. Referi nəinki oyunu, məni də susdurdu. Oyunu bu qədər saxladı.
– Metyu İfeanyi transferi açıqlandı. Amma 7 aydır ki, oynamır. Nə vaxt hazır olar?
– Bilirdik. “Sürix” son klubu olub. Biz toplanışa getmişik, o olmayıb. Fərdi məşqlər edib. Komanda şəklində məşqlərdən uzaq olduğu üçün ritmdən çıxır. Dəqiq gün deyə bilmərəm. Kimsə 5 günə, kimsə 10 gün formaya düşə bilər. İnanırıq ki, milli fasilə onu hazır duruma gətirməyə imkan verəcək.
– Yayda transfer edilən fubtolçular arasında narazı qaldığınız oyunçular var? Məsələn, Varqas, Kurçi…
– Varqası çoxları tərifləyir. Ondan nə istəyiriksə, onu edir. Biz bu gün Varqasdan danışırıqsa, deməli, ona və digər oyunçulara da vaxt lazımdır. Əsla və əsla heç bir futbolçudan narazılığımız yoxdur. Onları anlayırıq. Daha yaxşı işlər görmək potensialları var.