Adil Şükürovla yollarını ayıran “Kəpəz” yeni baş məşqçi axtarışlarına başlayıb. Gəncəlilər yenə seçimi yerli mütəxəssislər arasında edir.

Prosport.Az futbolinfo.az-a istinadən xəbər verir ki, namizədlərin siyahısı geniş deyil. Hazırda boşda olan bir çox məşqçi vaxtilə “Kəpəz”də işləyb və onlara yenidən dəvət göndərilməsi real deyil. Həm də Şükürov təcrübəsi göstərdi ki, uğursuzluğa görə göndərilən məşqçiyə yenidən etimad göstərilməsi heç də uğur gətirmir.

Bu səbəbdən Tərlan Əhmədov, Azər Bağırov və Azər Məmmədovun dönüşü ilə bağlı ehtimallar inandırıcı deyil. Mirbağır İsayev isə mətbuata açıqlamasında heç bir təklif almadığını söyləyib.

Hazırda ən real variant kimi Cavid Hüseynovun adı ön plana çıxıb. Vaxtilə “Şamaxı”nı, ardınca “Səbail”i I Liqaya endirən bu məşqçi ilə bağlı isə tərəddüdlər var. Klub rəhbərliyi son pillədə olan “Kəpəz”i xilas etmək üçün sabiq yarımmüdafiəçinin ən doğru variant olacağından əmin deyil. Lakin büdcə sıxıntılarının başladığı Gəncə təmsilçisində əcnəbi məşqçi gətirmək real görünmədiyindən, Hüseynovla anlaşılması mümkündür.