"Əlbəttə üzücü məğlubiyyət oldu. Rəqibin gücünə bələd idik. Evdə daha yaxşı oynayırlar. Demək istərdim ki, uşaqlar yaxşı mübarizə apardılar. Sonda qələbəni qorumağa konsentrasiyamız çatmadı. Bilirsiniz ki, biz də qısa vaxt ərzində çox çətin, gərgin oyunlar keçirdik".

Prosport.Az xəbər verir ki, bunu “Şamaxı”nın baş məşqçisi Ayxan Abbasov “Zirə” ilə oyundan sonra təşkil olunan mətbuat konfransında deyib.

Məğlubiyyətə baxmayaraq komandasının apardığı mübarizədən razı qalan mütəxəssis gələcəyə nikbin baxdığını vurğulayıb: “Qalib gəlmək bizim üçün çox vacib idi, amma yenə də bir oyunla heç nə bitmir. Bu cür oyunlar gənc futbolçularımız üçün çox vacib olmalıdır. Onlar ruhdan düşməməli, çalışıb daha çox inkişaf etməlidirlər. Gələn oyuna hazırlaşmalıyıq”.

Qeyd edək ki, Premyer Liqanın V turunda “Zirə”nin qonağı olan "Şamaxı" 1:2 hesabıyla məğlub olub.