"Bu kollektiv ilk dəfə təlim-məşq toplanışına yığışmışdı. Rəqib isə 7-ci dəfə idi bir araya gəlirdi. Hər 2 oyun bizim üstünlüyümüz şəraitində keçdi. Düzgün təhlillər və çalışmalar nəticəsində 2-ci matçda qələbə qazandıq”.

Prosport.Az xəbər verir ki, bu sözləri 15 yaşadək futbolçulardan ibarət Azərbaycan milli komandasının baş məşqçisi Aqil Nəbiyev Monteneqronun müvafiq yaş qrupundan ibarət komandası ilə keçirilən 2-ci yoxlama oyunundan (3:1) sonra AFFA-nın mətbuat xidmətinə açıqlamasında deyib.

Mütəxəssis yığmadakı futbolçuların potensiallarının böyük olduğunu deyib: “Uşaqları tanımaq üçün zaman lazımdır. Potensiallı oyunçulardır, ancaq fiziki durumla bağlı ciddi problemləri var idi. Millidə isə bunun üzərində çox çalışmaq imkanımız olmur. Çünki cəmi 3 məşqdən sonra oyuna çıxmışdıq. Sırf taktiki tapşırıqlara üstünlük veririk. Komandamız gələcəyə ümid verir. Hazırlıqların, beynəlxalq oyunların sayı nə qədər çox olsa, istər bu kollektivlə, istərsə də U-16 və U-17 millimizlə daha böyük işlər görmək olar”.

Qeyd edək ki, millimiz Monteneqro ilə ilk oyunda 0:0 hesablı heç-heçə edib, ikinci görüşdə 3:1 hesablı qələbə qazanıb.