AFFA-nın bayrağı altında təşkil edilən Gənclər Liqası (U-19) və U-17 Liqada 2025/2026-cı illər mövsümünün püşkü atılıb.
Prosport.Az xəbər verir ki, püşkatma mərasimi AFFA-nın inzibati binasında keçirilib.
AFFA Gənclər Liqası 12 komandanın iştirakı ilə 2 mərhələdən ibarət olacaq. İlk mərhələ 2 dövrədən ibarət dairəvi sistemlə keçiriləcək. 2-ci mərhələdə komandalar A və B qrupuna bölünəcək. A qrupunun qalibi ölkə çempionu olacaq.
Burada Premyer Liqada çıxış edən 10 klubun U-19 komandası mübarizə aparacaq. AFFA-dan güzəşt alan "İmişli" və "Karvan-Yevlax"ın müvafiq komandalarının əvəzinə isə EFA və "Dinamo" kollektivləri mübarizə aparacaq.
AFFA U-17 Liqası isə 15 komandanın iştirakı ilə 2 mərhələdən ibarət olacaq. 2 dövrəli ilk mərhələnin A qrupunda 7, B qrupunda 8 komanda mübarizə aparacaq. Qruplarda ilk 4 yeri tutacaq kollektivlər 2-ci mərhələdə A qrupunda çempionluq uğrunda mübarizə aparacaq. Digər komandalar isə B qrupunda yarışacaq. 2-ci mərhələ də 2 dövrədən ibarət olacaq.
Burada isə Premyer Liqanın komandaları ilə bərabər, "Lion", "Dinamo", "Şəfa", UFA və EFA-nın müvafiq komandaları mübarizə aparacaq.
Qeyd edək ki, hər iki liqada I turun oyunları sentyabrın 13-14-də keçiriləcək.
