2-9 iyul tarixlərində Bakıda çimərlik futbolu üzrə dünya çempionatının seçmə oyunları keçirildi. Millimiz doğma çimərlik qumunda fiasko ilə yadda qaldı.
Bəs bu uğursuzluğun günahını kimdə görək? Baş məşqçi Zeynal Zeynalovda, Polşadakı Avropa Oyunlarından qayıdarkən utandırıcı məğlubiyyətlərə baxmayaraq, hırıldayan futbolçularda, yoxsa 3-4 ildən bir peyda olan, səyahətçimi, yoxsa federasiya prezidentimi olduğu bəlli olmayan Fərid Novruzidəmi?
Bu milli əvvəlcə bu fiaskonu Avropa Oyunlarında yaşadı. Qrupda Polşaya 2:7, Portuqaliyaya 2:5 və İspaniyaya 1:7 uduzan milli heç bir əhəmiyyəti olmayan Ukraynaya 7:6 (əlavə vaxt) və Moldovaya 4:2 qalib gələrək 5-ci yeri tutdu. Krakuf hava limanında futbolçularımızı utanmadan danışdırmağa vadar edən də elə bu son 2 qələbə idi. Amma unutmasınlar ki, həmin Ukrayna və Moldova seçmə mərhələyə görə əsas heyətə güvənməmişdi. Ad çəkməyəcəm. Özü oxuyacaqsa, kimdən söhbət getdiyini biləcək. Aeroportda "mənim Moldova ilə qolum niyə verilməyib" davası edən futbolçu və futbolçular görəsən, buna görə heçmi utanmırdı?
Niyə də utansınlar? Dövlətin xətti ilə onları hələ avqustda Belarusda keçiriləcək II MDB Oyunları gözləyir. Pulsuz səfər, pulsuz səyahət, gəzinti keyfi...
Bakıda həmin Moldova millisinə 2:3, Estoniyaya 4:7 hesablı məğlubiyyətlər isə futbolumuz adına rüsvayçılıqdır. Moldova və Estoniya futbol ənənələri olmayan millilərdir. Üstəlik, Moldova dənizə çıxışı olmayan ölkədir. Deməli, Xəzər dənizindəki kimi çimərlik imkanları olmayan dövlətdir. Bu ölkəyə uduzursansa, həmin futbolçunun özünü oynadığın çimərlik qumunda basdırmaq lazımdır.
Azərbaycanda keçirilən yarışda millimizin 13-cü yeri tutmasına, futbolda Belarusun 3-cü dəfə dünya çempionatına çıxmasına ağzını ayırıb baxanlar, görəsən, heçmi utanmırmı? Fərid Novruzi ancaq 3-4 ildə bir peyda olub, jurnalistərin yadına salır ki, federasiya prezidenti kimi qalıb. Heç kimə sirr deyil ki, Novruzi AFFA-nın baş katibi Elxan Məmmədovla şəxsi əlaqələrinə görə o postdadır. Bəlkə çimərlik futbolu imkanlarımızın bol olduğu federasiya prezidenti postunu təhvil verməyin zamanı yetişib.
Pərvin
P.S, Eşitdiyimə görə, bu seçmə mərhələ oyunlarının təşkilatçılığı Bakı Şəhər Halqasının əməkdaşlarına tapşırılmışdı. O zaman tay tayını tapıb deməkdir.