Bu məsələ ilə bağlı jurnalistika prinsiplərinə uyğun olaraq Cabir İbrahimovun da fikrini öyrəndik.

O, Prosport.Az-a deyilənləri təkzib etdi:

"Mənə bu barədə heç nə deyilməyib. Aramızda belə söhbət olmayıb. Nə mən, nə də Nicat işdən çıxarılmayıb. Mən işdən çıxarıla bilmərəm, işdən özüm gedə bilərəm. Yalan söhbətdir".

12:49

"Kəpəz"də kadr dəyişikliklərinə start verilib.

Prosport.Az-ın əldə etdiyi xəbərə görə, "Kəpəz" PFK Məşq Mərkəzi və Futbol Akademiyasının direktoru Cabir İbrahimov vəzifəsindən çıxarılıb.

Həmçinin, klubun mühafizə xidmətinin rəisi Nicat Məmmədov da vəzifəsindən kənarlaşdırılıb. Yeni rəhbərlik onlarla işləmək istəməyib və bu vəzifələrə öz kadrlarını təyin etməkdə maraqlıdır.

Qeyd edək ki, 2016-2017-ci illərdə və 2024-2025-ci illərdə "Kəpəz"də icraçı direktor kimi işləmiş Cabir İbrahimov klubun əvvəlki İdarə Heyətinin sədri İlqar Nadirinin onun vəzifəsinə təyin olunması ilə "Kəpəz" PFK Məşq Mərkəzi və Futbol Akademiyasının direktoru vəzifəsinə keçirilmişdi.

Xatırladaq ki, may ayından etibarən "Kəpəz"i yeni rəhbərlik idarə edir. Əvvəlcə klubun İdarə Heyətinə Namiq Qədirov, daha sonra isə Adil Vəliyev təyin olunub.