"İlk növbədə qeyd edim ki, turnirdə bizim növbəti mövsümdən U-19 Liqasında çıxış edəcək komandamız (2008 təvəllüdlü futbolçular) iştirak edirdi və bu komanda mənə yad komanda deyil. Mövsüm boyu əsas komanda ilə üst-üstə düşməyəndə, mən bu komandanın oyunlarının bir çoxunda iştirak etmişəm. Və oyun baxımından uşaqlarla yaxşı anlaşırıq, hec bir adaptasiyaya ehtiyac yox idi".
Bunu Prosport.Az-a "Qarabağ"ın əsas komandası ilə məşqlərə çıxan futbolçu Amin Rzayev deyib.
Hələ oktyabrın 12-də 16 yaşını tamamlayacaq futbolçu İsveçin Yötebori (Göteborg) şəhərində keçirilən "Qotia Puma Trofi" (Gothia Puma Trophy) turnirində "Qarabağ"ın U-17 komandası ilə iştirak edib. Bu turnirdə "Qarabağ" kimi əsas komandanın düşərgəsindən qayıdan yeganə futbolçu məhz Amin Rzayev olub.
Futbolçu Avstriyadan İsveçə qayıtmasından danışıb: "Akademiyamızın koordinatoru Aftandil Hacıyev öncədən əsas komanda ilə planı razılaşdırmışdı ki, Avstriyadakı ilk 2 oyundan sonra mən turnirdə iştirak edə bilim. Avstriyada çox yaxşı hazırlıq kecdik. "Qarabağ"ın əsas komandasında rəqabət yüksək səviyyədədir. Mən orada "Tvente"yə 1:2 uduzduğumuz 2-ci matçda təxminən 15 dəqiqə oynadım. Bildiyiniz kimi, Çempionlar Liqası öncəsi son hazırlıq oyunumuz "Zalsburq"la idi. Mənim həmin matçda oynamaq şansım az olduğundan, "Yötebori", Nigeriyanın ən yaxşı Akademiyası olan "Sportinq" (Laqos) və digər güclü komandalarla beynəlxalq oyun təcrübəmi artırmaq üçün İsveçə getməyimi məqsədəuyğun saydılar. Beləcə klub "Metallist" və "Tvente" ilə oyundan sonra məni İsveçə göndərdi".
Yeniyetmə cinah müdafiəçisi daha sonra İsveçdəki oyunlardan danışıb. O, turnirin səviyyəsini tərifləyib: "İsveçdəki turnirdə bütün matçlarda oynadım. "Myelbi"yə qarşı ilk görüşümüzdə məğlub durumda olmağımıza baxmayaraq, çox yaxşı keyfiyyətli oyun nümayiş etdirib 2:1 qalib gəldik. Sonra ötən ilin çempionu olan "Sportinq" Akademiyası ilə 0:0 oynadıq. Həmin matçda çox güc sərf etdik, fikrimcə, fiziki və atletik cəhətdən turnirdə ən güclü komanda idilər. Uşaqlar bütün oyun boyu yaxşı mübarizə apardı. Qrupda 4 xal yığıb 1-ci yerdə gedirdik. Amma format elə idi ki, hər gün oynamalı idik. Buna bir az öyrəşməmişdik və reqlamentə görə məhdud oyunçu sayımız vardı. 3-cü oyunda artıq yorğunçuluq öz sözünü deyirdi və bəzi epizodlarda səhvlər edirdik. Rəqib isə İsveçin ən yaxşı komandalarından biri olan ev sahibi "Yötebori" idi. Məğlub olduq ve qrupda 3-cü yeri tutduq. Amma turnirdə ən yaxşı qrup 3-cüsü kimi B pley-offunda birbaşa 1/4 finala vəsiqə qazandıq. Həmin oyun öncəsi artıq bəzi itkilərimiz – son matçımızdan cəzalı və zədəli olan vardı. Diqqətsizlikdən ilk qolu buraxdıq ve heyf ki sonra geridönüş etməyi bacarmadıq. Ümumi götursək, fikrimcə, çox yaxşı komandaların mübarizə apardığı turnir idi. Xeyli sayda keyfiyyətli futbolçulara qarşı oyun təcrübəsi əldə etdik. Bəzi oyunçular var idi ki, turnirden sonra İsveç, Norveç klublarından peşəkar müqavilə təklifi aldı. Bir oyunçu kimi inkisaf etmək üçün çox yaxşı təcrübə idi. Üstəgəl, ölkəmizi də layiqincə təmsil etməyə çalışdıq. Məncə, belə turnirlər futbolçulara getdikcə inkişaf etmək üçün çox gözəl imkan yaradır".
Qeyd edək ki, Amin Rzayev hazırda da "Qarabağ"ın əsas komandası ilə birgə məşq keçir.
Səbuhi Musa
