"Uşaqlara "çox sağ ol" demək istəyirəm. Çünki bizə məşqçi kimi qulaq asırdılar, istədiyimizi edirdilər. Biz də onların üzərində çox durmuşduq ki, oyunları daha yaxşı olsun. Öyrətdiyimiz şeylər olduğu kimi, öyrətmədiklərimiz də var. Çünki vaxt az idi. 9 nəfərlik meydançadan 11 nəfərliyə keçid etdilər. Bu dövr çətin idi. Amma son final oyununda uşaqlar möhtəşəm oynadılar. Məncə, layiqincə çempion oldular".

Bunu Prosport.Az-a "Qarabağ"ın 14 yaşadək komandasının (U-14) məşqçisi Maksim Medvedev deyib.

"Qarabağ"ın U-14 komandası iyunun 13-də "Ulduz" Futbol Akademiyasının müvafiq komandasını 1:0 məğlub edərək çempion olub. Bu yaş qrupunda "Qarabağ"ın 2-ci çempionluğunda məşqçiliyə yeni başlamış Medvedevin də rolu olub.

35 yaşlı Maksim Medvedev məşqçiliyə başladığı ilk ildəcə çempion olduğuna görə sevincli olduğunu bildirib: "Məşqçiliyə başlayanda heç fikirləşmirdim ki, ilk ilimdə çempion olacağam. Daha çox çalışırdım ki, bu uşaqlara doğru futbol öyrədim. Onlar da xarakter göstərib vuruşdular və çempion oldular. Mənim üçün sevindirici haldır ki, ilk ilimi titulla başa vurdum. Gələcəkdə daha çox işimiz var və çalışacağıq ki, ən yaxşısını edək".

O, çempion olduqlarına görə bu komandanın Qazaxıstanda beynəlxalq turnirdə çıxış edəcəyini qeyd edib: "18 avqustda Qazaxıstanın Aktau şəhərində keçirilən turnirə gedəcəyik. Yarış 25 avqustadək davam edəcək. Orada Qazaxıstan klublarından başqa, "Fənərbağça", "Ferensvaroş", "Paxtakor" kimi əcnəbi komandalar da yarışacaq. Bu turnir rəhbərlik tərəfindən çempion olmalarına görə futbolçulara hədiyyə edildi. Aftandil Hacıyev də finaldan sonra bildirdi ki, çempion oldunuz, sizə hədiyyəmiz var, Qazaxıstanda turnirə göndəriləcəksiniz".

Qeyd edək ki, Samir Musayevin baş məşqçisi olduğu bu komandada Maksim Medvedevin oğulları – Miroslav və Daniil Medvedevlər də çıxış edir.