"Qarabağ"ın 17 yaşadək komandası (U-17) İsveçin Yötebori (Göteborq) şəhərində keçirilən ənənəvi "Gothia Puma Trophy" yarışında çıxış edəcək.

Prosport.Az-ın xəbərinə görə, Rəşad Sadiqovun baş məşqçisi olduğu komandanın artıq rəqibləri də bəllidir.

4-cü qrupda yer alan "Qarabağ" Nigeriyanın "Sportinq" (Laqos), İsveçin "Myelbi" və "Yötebori" komandaları ilə qarşılaşacaq. Komandamız 14 iyulda "Myelbi"yə (Bakı vaxtı ilə saat 11:10), 15 iyulda "Sportinq"ə (18:40) və 16 iyulda meydan sahibi "Yötebori"yə (12:00) qarşı oyun keçirəcək.

Turnir 24 komandanın iştirakı ilə keçiriləcək. Yarışda 12 İsveç, 12 əcnəbi komanda yer alacaq. "Gothia Puma Trophy" 13-19 iyul tarixlərində keçiriləcək.

Qeyd edək ki, "Qarabağ"ın U-17 komandası ölkə çempionatını "Neftçi"dən cəmi 1 xal geridə qalmaqla 2-ci sırada bitirib.