Bolqarıstanın Albena şəhərində “Golden Sands Cup 2025” beynəlxalq futbol turniri keçirilib.

Prosport.Az xəbər verir ki, Azərbaycanın “Ulduz” Futbol Akademiyasının 11 yaşlılardan ibarət komandası (U-11) bütün rəqiblərinə qalib gələrək turnirin qalibi olub.

Azərbaycan, Bolqarıstan, Moldova, Rumıniya və Ukraynadan 12 komandanın mübarizə apardığı turnirin qrup mərhələsində “Kids”ə (Moldova) 3:0, “ÇFR Timişoara”ya (Rumıniya) 9:0 və “Çempion”a (Ukrayna) 12:1 hesabı ilə qalib gələn təmsilçimiz yarımfinala qrup lideri kimi vəsiqə qazanıb. Komanda bu raundda Moldova “Yupiter”ini (6:3), finalda isə ev sahibi “Çerno More”ni (1:0) məğlub edib.

Xatırladaq ki, Gənclər və İdman Nazirliyinin təşəbbüsü və dəstəyi ilə 8 yaşdan 15 yaşadək istedadlı uşaqları heyətə cəlb edərək yaradılmış “Ulduz” FA qısa müddətdə ölkə çempionatında uğurlu çıxışı ilə fərqlənir.

Qeyd edək ki, nazirlik artıq 4 ildir ölkəmizdə aşağı yaş qrupları üzrə beynəlxalq futbol turnirləri təşkil edir. “Qol-15” Bakıda, “Ulduz Cup” isə Quba şəhərində keçirilib. Bu yaxınlarda Qubada növbəti dəfə keçiriləcək “Ulduz Cup” beynəlxalq turnirində ölkəmizin “Ulduz” FA və “Qarabağ”, eləcə də, Türkiyənin “Trabzonspor”, Özbəkistanın “Paxtakor”, Gürcüstanın “Dinamo” (Tbilisi), Küveytin “Qrand” FA, Qırğızıstanın SDYUŞOR, Qazaxıstanın “Şaxtyor” (Karaqanda) və Qətərin “Aspair Akademi” komandaları mübarizə aparacaq.

Onu da bildirək ki, bu ay "Qarabağ"ın U-13 komandası da Bolqarıstanın Sozopol şəhərində beynəlxalq turnirin qalibi olmuşdu.