"Qarabağ"ın 13 yaşadək futbolçulardan ibarət komandası (U-13) “Sozopol Cup 2025” turnirinin qalibi olub.

Prosport.Az xəbər verir ki, Elşad Xudadatovun baş məşqçisi olduğu komanda Bolqarıstanda təşkil olunan yarışın A qrupunun son matçında "Botev"i 2:0 məğlub edib (qol müəllifi: Emil Həsənzadə, avtoqol).

Bu qələbə ilə komandamız qrup mərhələsini 10 xalla tamamlayaraq 2-ci yer ilə yarımfinala vəsiqə qazanıb. Yarımfinalda "Levski" ilə əsas vaxt qolsuz heç-heçə ilə başa çatıb. Penaltilərdə "Qarabağ" Sofiya klubunu 4:3 məğlub edərək finala yüksəlib.

"Qarabağ" bu gün keçirilən final matçında “Burqas”la qarşılaşıb. Komandamız bu görüşdə 2 cavabsız qolla qalib gəlib. "Qarabağ”ın heyətində Kamil Bədirxanlı və Zəfər İbrahim fərqlənib. Bununla da Ağdam klubu turnirin qalibi adına yiyələnib və kuboka sahib çıxıb.

Qeyd edək ki, bu komanda AFFA U-13 Liqasında 1/4 finalda "Neftçi"yə uduzaraq mübarizəni medalsız başa vurmuşdu.