"Qarabağ"ın 13 yaşadək komandası (U-13) Bolqarıstanın Sozopol şəhərində keçirilən beynəlxalq turnirdə uğurlu çıxışını davam etdirir.

Prosport.Az-ın xəbərinə görə, Elşad Xudadatovun baş məşqçisi olduğu komandamız iyunun 11-də Bolqarıstanın "Septemvri" komandasına 1:0 (qol müəllifi: İsmayıl Rəsulov) və ayın 12-də "Olimpiya" komandasına 5:1 (qol müəllifləri: Kamil Bədirxanlı (2), Zəfər İbrahim, Ayxan Verdiyev, Musa Musayev) qalib gəlib.

"Qarabağ" bu gün 2 oyun keçirib. Təmsilçimiz əvvəlcə Bolqarıstanın "Etar" komandasına 0:1 uduzub. Günün son matçında isə məşhur "Ludoqorets"lə 1:1 heç-heçə edilib. Elcan Qəriblinin 57-ci dəqiqədə vurduğu qol "Qarabağ"ı məğlubiyyətdən xilas edib.

7 xalı olan komandamız sabah A qrupunda son görüşünü keçirəcək. "Qarabağ" Bakı vaxtı ilə saat 15:30-da Bolqarıstanın "Botev" komandası ilə qarşılaşacaq.

Qeyd edək ki, "Qarabağ" yarımfinala çıxsa, oyununu iyunun 15-də keçirəcək.