AFFA U-17 Liqasında çempionun taleyi son turda həll olunacaq.

Prosport.Az-ın xəbərinə görə, "Qarabağ" XLIV turda "Sərhədçi" İdman Mərkəzində 13-cü sırada olan "Kəpəz"i 7:3 məğlub edib.

"Qarabağ"dan qolları Əli İbrahim (3, 33), Əli Əliyev (15, 52, 60), Nihat İsgəndərov (41), İlkin Hacıyev (68), "Kəpəz"dən isə Sənan Qasımov (10), Ramal İmamquliyev (53) və Əli Nəcəfov (80) vurub.

Meydan sahiblərindən Əli Qazıbəyov 37-ci dəqiqədə penaltidən yararlana bilməyib.

Xatırladaq ki, I dövrədə "Qarabağ" öz meydanında da "Kəpəz"i 9:0 məğlub etmişdi.

Lider "Neftçi" 3-cü sıradakı "Zirə" ilə səfərdə 3:3 oynadığından, çempionluq kubokunun sahibi son turda bəlli olacaq. Hazırda "Neftçi" 106 xalla 1-ci, "Qarabağ" 105 xalla 2-cidir.

Son turda "Qarabağ" "ASCO Arena"da 11-ci pilləni tutan "Səbail"in qonağı olacaq. "Neftçi" isə öz meydanında 4-cü sırada olan "Turan Tovuz"u qəbul edəcək. Hər iki matç iyunun 16-da saat 17:00-da başlayacaq.