Premyer Liqaya qayıdan "Qəbələ" transfer çalışmalarına başlayıb.

Prosport.Az-ın xəbərinə görə, Kaxaber Sxadadze Moldovanın "Belts" klubunda çıxış edən Kayu Fereyranı transfer etmək üçün rəsmi təklif göndərib.

Tam adı Kayu Fereyra Martins olan futbolçu braziliyalıdır və mərkəz hücumçusu mövqeyində çıxış edir. O, driblinqi və cərimə zərbəsindən qol vurmağı ilə seçilir.

Futbolçu başa çatan mövsümdə 12 qolla Moldova çempionatının bombardiri olub. Ümumilikdə isə Kayu Moldovada 1 mövsümə 26 oyun keçirib, 15 qol vurub, 2 dəfə het-trikə, 2 dəfə isə məhsuldar ötürməyə imza atıb. 24 yaşlı futbolçunun Belts təmsilçisi ilə müqaviləsi iyunun 30-da başa çatacaq.

"Qəbələ" Kayu Fereyraya 2 illik müqavilə təklif edir.