"Qarabağ"ın 17 yaşadək komandası (U-17) lider "Neftçi" ilə heç-heçə edib.

Prosport.Az-ın xəbərinə görə, AFFA U-17 Liqasının XL turu çərçivəsində "Sərhədçi" İdman Mərkəzinin stadionunda keçirilən qarşılaşma gərginliyi ilə seçilib.

Hesabı 7-ci dəqiqədə meydan sahibi "Qarabağ" açıb. "Köhlən atlar"ın hücumçusu Əli İbrahim fərqlənib. Bu, çempionatın bombardirinin liqada 48-ci qolu olub. 41-ci dəqiqədə Pünhan Qasımzadə hesabı bərabərləşdirib.

63-cü dəqiqədə baş hakim "Qarabağ"ın qapısına penalti təyin edib. Lakin Nicat Məhərrəmovun penaltidən yararlanmasına "Qarabağ"lı qolkiper Elşən Nəsirov mane olub. Son dəqiqələrdə "Qarabağ" qol vursa da, hakim bunu hesaba almayıb. Beləliklə, görüş 1:1 hesabı ilə başa çatıb.

Qeyd edək ki, "Neftçi" 96 xalla liderliyini qoruyub saxlayır. "Qarabağ" 87 xalla 3-cüdür. Komanda rəqibindən 2 matç az keçirib.