"Neftçi" Azərbaycan Basketbol Liqasının final seriyasının 4-cü matçında "Sabah"a qalib gələrək (84:66) ümumi hesabı bərabərləşdirib - 2:2.

Prosport.Az xəbər verir ki, hər iki komandanın məşqçisi qarşılaşma ilə bağlı fikirlərini bölüşüb:

Daviti Çivçivadze ("Neftçi"): "Oyunçularımız hücumda və müdafiədə cox möhtəşəm performans göstərdilər, xarakter nümayiş etdirərək qalib gəldilər. Komandamın belə oyununu gördükdə çox sevinirəm. Ancaq bu final seriyasıdır və 4 qalibiyyətə kimidir. Növbəti görüşlərə hazırlaşmalıyıq, çünki çox çətin oyunlar olacaq. İnanıram ki, gələcək oyunlarda da ən yaxşı tərəfdən özümüzü göstərəcəyik. Komandamı layiqli qələbə münasibətilə ürəkdən təbrik edirəm".

Rimas Kurtinaytis ("Sabah"): "Seriyada ümumi hesab 2:2-dir. Hər şey yenidən başlayır. Məğlubiyyətimizə bəraət yoxdur. Fiziki yorğunluq səbəb ola bilməz. Çünki rəqib də eyni şərtlər altında mübarizə aparır. "Neftçi" mobil oyun sərgilədi. Bizdə isə heçnə alınmadı. Növbəti matçın bazar günü keçirilməsi oyunçulara bir qədər istirahət verməyə şərait yaradır. Bu, pley-offdur. Final seriyasında hər iki tərəf ən yaxşı oyununu göstərməyə çalışır. Bizim kimi, rəqib də hər oyuna qələbə üçün çıxır”.