Baş tutan sonuncu “Qarabağ” – “Neftçi” matçı yenə də “ağdamlı”ların mütləq qələbəsi ilə yekunlaşdı. Əslində bu nə azarkeşlər üçün sürpriz oldu, nə də futbol ictimaiyyəti üçün. Neftçi" – "Qarabağ" matçı derbi deyil, artıq heç böyük oyun da deyil, ümumiyyətlə son oyun “Qarabağ”ın məşq prosesindən fərqlənmirdi.
“Neftçi”nin problemi barədə bəlkə də yüzlərlə şərh yazılıb, yüzlərlə fikir irəli sürülüb. Ortaq gəlinən nəticə isə budur ki, bu heyət Azərbaycan Premyer Liqasında oynamağa qadir deyil. Baş məşqçi Samir Abasovun demək olar ki, son matçlardan sonra mətbuat konfransında səsləndirdiyi fikirlər aşağı-yuxarı bunu deməyə əsas verir. Baş məşqçi konkret olaraq heyətdə ad çəkib demək istəməsə də, ümumi ab-havadan nə qədər narazı olduğunu görmək mümkündür. Müdafiə xəttində Yuri Matias, Azər Salahlı, Azər Əliyev kimi futbolçuları olan məşqçi neyləsin axı? Düzdür, yanvarda gərək ki, müdafiəçi transfer edəydilər, amma düşünürəm ki, Abasov bu məsələdə tələsib sələfləri kimi səhv etmək istəmədi və bu problemi yay transfer pəncərəsinə saxladı. Yox, əgər yayda bu 3 futbolçu ilə müqavilələrin müddəti yenə artırılsa, yayılan söz-söhbətləri daha da alovlandıracaq.
Yarımmüdafiə xətti klubda normal sayılacaq yeganə zonadır desək, əminəm ki, mənimlə razılaşarsınız. Ancaq, hücum və müdafiədəki etibarsız oyun onların da əziyyətini heç edir.
Hücum xəttindən isə danışmağa ehtiyac yoxdur....
Bəs problemləri necə həll etmək olar? Təbii ki, büdcəsi milyonlarla olan klubun heyət qurmaqda bu qədər aciz olmasının səbəbkarı seleksiya işini birbaşa öz üzərinə götürən adamların bu sahəni öz qazancları kimi görməsindədir. Bu futbolçuların çoxu Roman Qriqorçukun vaxtında transfer edilib və idman direktoru Andersonun “ok”u alınıb. Bəh-bəhlə ölkə futboluna sırıdılan Anderson bu prosesdən yaxşıca pul qazanmamış olmaz. Futbolçuların bəzilərinin müqavilələri hələ də davam etdiyindən onlarla bunu pozmaq da asan olmayacaq. Bunun üçün indidən danışıqlara başlamalı, futbolçuları mövsüm sonunda yola salmaq lazımdır.
Səbuhi Sadiq
PS: “Neftçi 2”dən 3-4 oyunçu cəlb edib onların yerinə əsas heyətə buraxsalar ki, inanın ki, daha faydaları olarlar.
İkinci həll yolu isə, növbəti ili də qurban verib optimal heyət üçün 1-2 transfer pəncərəsi gözləməkdir. Nəzərə alaq ki, təkcə yayda tez-bazar qurulacaq heyət yenə də “köhnə tas” effekti verər, bu səbəbdən bir ili heyət qurmağa həsr etmək məntiqli görsənir. Bu il ərzində də köhnə futbolçularla sağollaşmaq mümkün olacaq. Əminəm ki, 10 ildir uğursuzluq görməkdən yorulan azarkeşlər uğur naminə 1 il də gözləyərlər.