“Turnirə yaxşı hazırlaşmışdıq. Hər iki rəqib güclü idi".

Prosport.Az xəbər verir ki, bunu 17 yaşadək futbolçulardan ibarət Azərbaycan milli komandasının (U-17) baş məşqçisi İlham Yadullayev Albaniyanın Elbasan şəhərində təşkil olunan Avropa çempionatının II seçmə mərhələsində keçirdikləri oyunları dəyərləndirərkən deyib.

O, əvvəlcə B Liqasının VI qrupunda meydan sahibi Albaniya yığmasına (1:4) qarşı keçirilmiş ilk oyunu qiymətləndirib: "İlk oyunumuz meydan sahibi Albaniya yığmasına qarşı oldu. Standart vəziyyətdən erkən qol buraxdıq. Matçın startında uşaqlarda həyəcan hiss olunurdu. Hissənin sonlarına yaxın oyunu bərabərləşdirdik. 2-ci hissəyə ön xətdə pressinqlə başladıq və bunun bəhrəsini gördük. Bərabərlik qolundan sonra irəlidə təzyiqi davam etdirmək istədik. Ancaq qısa müddətdə qapımızda 2-ci qolu buraxdıq. Bundan sonra hücuma atılsaq da, rəqib əks-hücumlarla daha 2 dəfə fərqləndi”.

İlham Yadullayev U-17-nin Uels ilə heç-heçə etdiyi (0:0) qarşılaşmada daha inamlı oyun sərgilədiklərini deyib: “Albaniya texniki cəhətdən yaxşı komanda idisə, Uels fiziki və taktiki cəhətdən güclü görünürdü. Bərabər səviyyədə mübarizə getdi. İlk hissədə qapımıza təyin edilən penaltini qapıçımız dəf etdi. Bu, futbolçularımızda ruh yüksəkliyi yaratdı. Qol vurmaq üçün imkanlarımız oldu. Elə mübarizə getdi ki, hər iki komanda qalib gələ bilərdi. Uşaqlarda həyəcan olmadığından, bu dəfə daha rahat çıxış etdilər. 2 oyunda 1 xal toplamağımıza görə təəssüflənirəm. Ancaq gələcəkdə daha uğurlu nəticələr qazanmaq üçün əlimizdən gələni edəcəyik”.