Azərbaycan Basketbol Liqasının XVIII turunda "Gəncə" "Ordu"ya 84:74 hesablı qələbəyə sevinib.

Prosport.Az hər iki komandanın baş məşqçisinin fikirlərini təqdim edir:

Halil Atlı (“Gəncə”): "Komandamı qələbə münasibətilə təbrik edirəm. Rotasiyadan istifadə edərək oynamağa çalışdıq. Çox çətin dövrdən keçirik. Ardıcıl oyunlara çıxırıq. Yaxın günlərdə bizim üçün vacib daha bir matç olacaq ("Şəki" ilə oyunu nəzərdə tutur – red.). "Ordu" kollektivi oyunçuları ilə təhlükəli rəqibdir. Bu gün oyuna biz yaxşı başladıq. Basketbolçular öncədən verdiyimiz tapşırıqları meydanda yaxşı yerinə yetirdi. Görüşün irəliləyən bölümündə rəqib də qarşılıq verdi. Amma biz oyunun qırılma nöqtəsinə gəlməsinin qarşısını ala bildik. Meydançada lazım olan işləri gördük. Nəticədə də qalib gəldik. Azarkeşlərimizə minnətdarlığımı çatdırıram. Bizi yenə dəstəksiz qoymadılar. Onların dəstəyi bizim üçün çox önəmlidir. İnşallah, ən yaxşı şəkildə çempionatı başa vuracağıq".

Alberto Blanko (“Ordu”): “İlk növbədə “Gəncə” komandasını təbrik edirəm. Biz əslində oyunu ilk periodda uduzduq və həmin 10 dəqiqədə zəif təsir bağışladıq. Sonrakı periodlarda, xüsusilə böyük fasilədən sonra rəqibə ciddi müqavimət göstərdik. Bu oyunu unudub, artıq qarşıdakı oyunlara hazırlaşacağıq”.