Minifutbol üzrə Azərbaycan çempionatının qalibi bəlli olub.

Prosport.Az xəbər verir ki, final matçında "Birbaşa Bakı" və "Zirə" komandaları qarşılaşıb.

Maraqlı və bərabər səviyyəli keçən mübarizədə “Birbaşa Bakı” qalib gəlib. Oyunun 2-ci hissəsində əvvəlcə Eşqin Tağıyev hesabı açıb. Daha sonra Təmkin Xəlilzadə vurduğu gözəl qolla oyunun nəticəsini müəyyənləşdirib. Beləliklə əzəli rəqibi olan “Zirə”yə 2:0 hesabı ilə qalib gələn “Birbaşa Bakı” növbəti dəfə Azərbaycan çempionu olub.

Bu matçdan öncə isə 3-cü yer uğrunda görüş keçirilib. “Qalaksi” və AZNUR komandalarının oyununda əsas vaxtda qapılara qol vurulmayıb. Penaltilər seriyasında isə daha dəqiq olan AZNUR kollektivi 3:1 hesabı ilə üstün olaraq Azərbaycan çempionatının bürünc medallarını qazanıb.

Turnirin ən yaxşı qapıçısı “Zirə”nin qolkiperi Ağaseyid Qasımov seçilib. Bu futbolçunu Azərbaycan Minifutbol Federasiyasının vitse-prezidenti Taleh Nəsibov mükafatlandırıb. Turnirin ən məhsuldar oyunçusu “Göyçə”nin üzvü Tural Adıgözəlova mükafatı “Zirə” futbol klubunun baş məşqçisi Rəşad Sadıqov təqdim edib. Çempionatın ən yaxşı oyunçusu “Birbaşa Bakı”nın üzvü Elvin Əlizadə olub. Ona mükafatı Azərbaycan Minifutbol Federasiyasının prezidenti Orxan Məmmədov tərəfindən verilib.

Çempionatda 3-cü yeri tutan AZNUR komandasına medalları AFFA-nın baş katibi Cahangir Fərəcullayev və icraçı vitse-prezidenti Sərxan Hacıyev təqdim edib. Həlledici oyunda məğlub olaraq 2-ci olan “Zirə”yə gümüş medallar gənclər və idman naziri Fərid Qayıbov və Orxan Məmmədov tərəfindən verilib. Nəhayət, Azərbaycan çempionu olan “Birbaşa Bakı” komandasına medalları ölkəmizdə səfərdə olan Dünya Minifutbol Federasiyasının prezidenti Filip Çuda və Avropa Minifutbol Federasiyasının prezidenti Peter Klarik tərəfindən verilib.

Sonda çempionluq kubokunu Orxan Məmmədov qalib komandaya təqdim edib.

Qeyd edək ki, finaldakı hər iki komanda yeni mövsümdə də Azərbaycanı Çempionlar Liqasında təmsil edəcək.