Futbol millimizlə Sumqayıtda yoldaşlıq oyunu keçirəcək Haiti millisinin heyəti bəlli olub.
Prosport.Az xəbər verir ki, baş məşqçi Sebastyen Minye 24 futbolçuya dəvət göndərib.
Heyətdə Fransa, Türkiyə, Yunanıstan, Niderland, Danimarka, Belçika, İtaliya, Portuqaliya, ABŞ, Ekvador, Albaniya, Yamayka və Litvada oynayan futbolçular var. Ümumiyyətlə, Peterson Pyer-Luis istisna olmaqla, bütün futbolçular Haitidən kənarda çıxış edir.
Bu heyətdə Peterson Pyer-Luis, Vilquen Poqan, Teo Mişel, Emerson Less və Ruben Providens debütantdır. Həmçinin, Haiti millisinin müdafiəçisi Fransua Düliss və millimizin arxa xətt oyunçusu Zamiq Əliyev də bir-birinə qarşı oynamaq imkanı əldə edəcək. Çünki onların hər ikisi Albaniya çempionatının lideri "Eqnatiya"da oynayır.
Bu yaxınlarda ölkəmizdə səfərdə olmuş Mayami "İnter"inin argentinalı kapitanı Lionel Messi, ispaniyalı yarımmüdafiəçisi Serxyo Buskets və uruqvaylı hücumçusu Luis Suaresin komanda yoldaşı Fafa Piko da Azərbaycana gələcək. Əsl adı Fabris olan 34 yaşlı ABŞ doğumlu hücumçu bu il sərbəst futbolçu kimi prezidenti ingilis Deyvid Bekhemin, baş məşqçisi argentinalı Xavyer Maskeranonun olduğu "İnter"ə keçib.
Qapıçılar: Qarison İnosent ("Riteryay", Litva), Jona Mednar ("Veyk Forest Yuniversiti", ABŞ), Aleksandr Pyer ("Soşo-Monbelyar", Fransa);
Müdafiəçilər: Karlens Arküs ("Anje", Fransa), Martin Eksperiens ("Nansi Loren", Fransa), Dük Lakroa ("Kolorado Sprinqs Svitçbəks", ABŞ), Rikardo Ade (LDU, Ekvador), Jan-Kevin Düvern ("Kortreyk", Belçika), Peterson Pyer-Luis ("Real Houp" Futbol Akademiyası), Fransua Düliss ("Eqnatiya", Albaniya), Vilquen Poqan ("Zankt Pölten", Avstriya);
Yarımmüdafiəçilər: Karl Fred Sante ("Feniks Rayzinq", ABŞ), Denli Jan Jak ("Filadelfiya Yunion", ABŞ), Leverton Pyer, Teo Mişel (hər ikisi "Şatoru", Fransa), Kristofer Atis ("Lekko 1912", İtaliya), Emerson Less ("Maunt Plezent" Futbol Akademiyası, Yamayka);
Hücumçular: Dükkens Nazon ("Kayserispor", Türkiyə), Frontdi Pyero (AEK, Yunanıstan), Mondi Prunye ("Frank Boran", Belçika), Fafa Piko ("İnter", ABŞ), Dani Jan ("Toreense", Portuqaliya), Ruben Providens ("Almere Siti", Niderland), Luisius Don Didson ("Oense", Danimarka).
Qeyd edək ki, ötən il məğlubiyyətsiz olan Haiti millisi (1 heç-heçə, 8 qələbə) Fernandu Santuşun çalışdırdığı yığma komandamızla martın 22-də qarşılaşacaq. Görüş Mehdi Hüseynzadə adına Sumqayıt şəhər stadionunda baş tutacaq. Oyun saat 21:45-də start götürəcək.
