Azərbaycan millisinin sabiq futbolçusu Abdulla Abatsiyev Moskvada həbs olunub.

Prosport.Az xəbər verir ki, 31 yaşlı sabiq yarımmüdafiəçi fırıldaqçı dəstədə yer almaqda ittiham olunur.

O, Moskvadakı cinayətdə kuryer rolunu oynayıb. Abatsiyevin yer aldığı dəstə 79 yaşlı təqaüdçünü aldadaraq 14 milyon rublu (265 min 188 manat) onlara verməyə inandırıb.

Qeyd edək ki, Abdulla Abatsiyev Azərbaycan milli komandasının heyətində 1 oyun keçirib. O, 2014-cü ilin mayında ABŞ yığması ilə yoldaşlıq oyununda (0:2) iştirak edib. Son olaraq Rusiya Media Liqasında "Fayt Nayts" klubunda çıxış edən Abatsiyev Azərbaycanda müxtəlif illərdə "Sumqayıt" və "İnter"in (indiki "Şamaxı") şərəfini qoruyub.