II Liqada çıxış edən "Haypers Quba" klub rəhbərliyi tərəfindən oruc tutan futbolçuların cəzalandırılmasına xəbərinə aydınlıq gətirib.

Komandanın baş məşqçi Elvin Həsənov Prosport.Az-a açıqlamasında yayılan məlumatı təkzib edib:

"Özüm də daxil olmaqla, 3 nəfər məşqçi və 6-7 nəfər oruc tutur. Klub prezidentimizin özü komandaya iftar qonaqlığı verib. Belə bir şeyin olması mümkün deyil"

15:07

II Liqanın son turunda evdə "Şəmkir"ə 1:2 hesabı ilə uduzan "Haypers Quba"nın futbolçuları klub rəhbərliyi tərəfindən cəzalandırılıb.

Prosport.Az sportinfo.az-a istinadən xəbər verir ki, martın 1-də, yəni, Ramazan ayının ilk günü meydana çıxanların hamısı cəriməyə məruz qalıb. Oyunçuların bir qismi orucunu pozmadan yaşıl sahəyə ayaq basdıqları üçün rəhbərliyin qəzəbinə tuş gəlibsə, digərləri bu halı bilib, idarəçilərə məlumat vermədiyindən cərimələnib.

Məlum olub ki, klub rəhbərliyi Ramazan vaxtı keçirilən oyun günlərində oruc tutmamaları üçün kollektiv üzvlərinə öncədən xəbərdarlıq edib. Qısacası, futbolçular bu qərara sözlü şəkildə etiraz bildirməsələr də, tapşırığa əməl etməyiblər - göstərişi qulaqardına vurublar.

Burada bir məqama da diqqət yetirmək lazımdır - hazırda "Şəmkir"i çalışdıran Vüqar Nadirovun baş məşqçi kimi ilk iş yeri "Haypers Quba" olub. Şimal təmsilçisinə Region Liqasının gümüş medallarını qazandıran, daha sonra pley-off oyunlarında "Şəfa"ya qalib gələrək II Liqaya yüksəldən gənc mütəxəssis ötən ilin noyabrında buradan ayrılıb. Özü də deyə-gülə yox, ciddi narazılıq və qalmaqalla. Odur ki, bu matç həm onun, həm də “Haypers Quba"nın rəhbərliyi üçün ikiqat prinsipiallıq daşıyırdı.