Azərbaycan Kubokunun 1/4 final mərhələsi çərçivəsində baş tutan “Neftçi” – “Kəpəz” (1:0) matçından sonra meydan sahibi komandanın baş məşqçisi Samir Abasov jurnalistlərin suallarını cavablandırdı.
Prosport.Az xəbər verir ki, mütəxəssis əvvəlcə görüşlə bağlı fikirlərini bölüşdü:
– Azarkeşlərimizə təşəkkür edirəm. Gələnlər də, gələ bilməyənlər də. Bir də meydançada çalışan yoldaşlara təşəkkür edirəm. Allah əziyyətlərini yerdə qoymasın. O qədər belə insanlar var ki, kölgədə qalır. Sağ olsunlar.
– “Kəpəz”i hansı komponentlərdə üstələdiniz?
– İlk oyundan sonra komandanı hazırlamaq bir az təhlükəli idi. Çünki rahatçılığı aradan qaldırmaq lazım idi. Amma ilk dəqiqədən də oyunçularım xarakter göstərdi. Sağ olsunlar. Soyunub-geyinmə otağında onlara təşəkkür edə bilmədim. Reallığı götürsək, bəlkə də ilk oyunda matçın müqəddəratı həll olunmuşdu. Amma xarakter göstərdilər.
– Martın 22-dən sonra “Neftçi”ni çətin oyunlar gözləyir. Siz isə 22-dən sonra toparlanacağınızı demişdiz. Bunu zarafatla demişdiniz yoxsa hesablama aparmışdınız?
– Zarafatla demişdim.
– Bəs, rəqiblər haqda nə düşünürsünüz? Əvvəl “Araz-Naxçıvan”, sonra da “Sabah”la qarşılaşacaqsınız…
– Bizim kimi rəqib də Kuboka köklənib. Həddən artıq çətin olacaq. Biz hər həftə sonu oynayacağımız matçlara köklənirik. Bunun müddəti yoxdur. Nə qədər tez köklənə bilsək, bu il nə qopara biliriksə, onu da etsək yaxşı olar. Xal yığmağa çalışırıq... Hakimliklə bağlı danışacağam. Uzun müddətdir ki, referilər haqda danışmaq istəmirdim. Amma verilən qərarlar, bizim oyunlarda baş verən hadisələr məni narahat etməyə başlayır. “Neftçi”nin baş məşqçisi kimi bunu deməliyəm. Hər bir moment bizə seminar kimi gəlir. Hər bir epizod kitabda yazıldığı qədər olmur. Hər şeyi dərk edib və analiz edib qərarlar verilməlidir. Qırmızı vərəqəyə də ona görə etiraz etdim və yenə də edirəm. Çünki top bizdəydi. Bu epizodda məncə “qırmızılıq” bir şey yox idi. Diqqətli olmaq lazım idi. Referilərin düşdüyü situsiyaya görə qərar vermələrini istəyirəm.
– Hakimin epizodu VAR-da dəyərləndirməyə kifayət qədər də vaxtı oldu. Sizcə, bundan sonra verilən qərar sizə qarşı qərəzdən irəli gəlir?
– Bu, qərəz deyil. Özünü hər halda hakim sayan bu gün kitabı açacaq və buna oxşar bir qayda tapacaq. Burada düşdüyü situasiyaya görə qərar vermək lazımdır. Mənim ötürməmdən sonra ayağım sürüşüb dəyirsə, burada şiddət yoxdur. VAR-a baxdıqda bunu bir az məntiqlə düşünmək lazım idi. Buna görə də etiraz etdim və “sarı” aldım. Qərəzdir və ya qərəz deyil, bunu deyə bilmərəm.
– Apellyasiyaya müraciət edəcəksiniz?
– Çıxan qərara baxacayıq. Ümid edirəm ki, həmin şəxslər də bu məqama baxar. Bu cür epizodları bir az incələyərlər və apellyasiyaya müraciət etməyə heç lüzum qalmaz.
– Çempion etdiyiniz “Neftçi”də önəmli fiqurlar var idi. Bu gün isə həmin fərdi ustalığa malik oyunçular yoxdur. Bu heyəti siz yığmamısınız, amma yayda görə bilərikmi?
– Niyə yoxdur sualına cavab vermək mənim üçün çox çətindir. Çünki məndən öncə məşqçilər olub. Demirəm ki, bizdəkilər pis futbolçulardır. Amma oyun üslubundan çox şey asılıdır. Elə mövqelər var ki, istədiyim tərzdə futbolçularım yoxdur.