"2 gündür ki, Bakıdayam. Burada olmaq çox gözəldir. Azərbaycan xalqı çox istiqanlıdır. Dəvətə görə AFFA rəhbərliyinə minnətdaram".

Prosport.Az xəbər verir ki, bu sözləri Bakıda səfərdə olan UEFA Hakimlər Komitəsinin üzvü, Talant və Mentor Proqramının rəhbəri, eyni zamanda, hakim-inspektor Byörn Kuypers jurnalistlərə açıqlamasında deyib.

Bakıda hakimlər üçün seminar keçən niderlandlı mütəxəssis tədbirin yüksək səviyyədə təşkil edildiyini bildirib: "Bakı haqqında təəssüratlarım çox yaxşıdır. Seminarda Azərbaycanın 3 beynəlxalq dərəcəli hakimi də iştirak edirdi. Düşünürəm ki, bu, çox gözəl haldır. Azərbaycanlılar onlarla qürur duymalıdır".

Onun sözlərinə görə, referilər beynəlxalq oyunlara daha çox təyinat ala bilmək üçün günü-gündən səviyyələrini artırmalıdır: "Bu yolda əzmkarlıqla çalışmalısınız. Həm qadın, həm kişi hakimlərə yaxşı şərait yaratmaq lazımdır. Buna görə də hakimlərin sayını artırmaq üçün işlər görməyə davam etməliyik".

Qeyd edək ki, 2002-ci ildə hakimliyə başlayan Kuypers 2006-cı ildə FIFA kateqoriyasını alıb. 2009-cu ildən karyerasını başa vurduğu 2021-ci ilə qədər elit kateqoriyanı daşıyan Kuypers iki dəfə (2014, 2018) dünya, üç dəfə (2012, 2016, 2020) isə Avropa çempionatının final mərhələsinin matçlarına təyinat alıb. Həmçinin UEFA Çempionlar Liqası, Avropa Liqası, FIFA klublararası dünya çempionatı, FIFA Konfederasiyalar Kuboku kimi mötəbər yarışlarda dəfələrlə oyunlar idarə edib.

Niderlandlı mütəxəssis 2009-cu ildə U-21 Avropa çempionatının finalını, 2011-ci ildə UEFA Superkubokunu, 2013-cü və 2018-ci illərdə UEFA Avropa Liqasının finalını, 2013-cü ildə FIFA Konfederasiyalar Kubokunun finalını, 2014-cü ildə UEFA Çempionlar Liqasının finalını, eyni zamanda AVRO-2020-nin finalını idarə edib, DÇ-2018-də isə 4-cü hakim olub.

Byörn Kuypers 2021-ci il iyulun 29-da “Ayaks”la PSV arasında keçirilən Niderland Superkuboku uğrunda matçı idarə etdikdən sonra karyerasını başa vurub.