Azərbaycan millisinin futbolçusu Renat Dadaşovun Polşanın “Radomyak” klubuna keçidinin səbəbi müəyyənləşib.

Prosport.Az Almaniya mətbuatına istinadən xəbər verir ki, 25 yaşlı forvard yenidən özünə doğma olan ölkəyə qayıtmaq üçün bu addımı atıb.

Bildirilib ki, “Laypsiq” və “Ayntraxt”ın akademiyalarında futbolun sirlərini öyrənən Dadaşovun “Ankaragücü”dən ayrıldıqdan sonra başqa təklifləri də olub. Lakin onun Polşa seçimi Almaniyaya qayıtmaq arzusundan irəli gəlir: “Bundesliqa klubları Polşa çempionatına hər zaman böyük maraq göstərir. Dadaşovun istedadına isə Almaniyada hər kəs bələddir. O da bunları gözəl başa düşür. Ekstraklasada özünü yenidən göstərə bilsə, Almaniyaya dönmək üçün bütün qapıların üzünə açılacağını bilir. Bir sözlə, “Radomyak” Renatın karyerasında yüksəlişə keçmək üçün tramplin ola bilər”.

Qeyd edək ki, Renat Dadaşov “Radomyak”la 1 il uzatmaq şərti ilə mövsümün sonuna qədər müqavilə bağlayıb.