Bolqarıstanın “Beroe” klubunun hücumçusu Santyaqo Qodoy Azərbaycandan təklif alıb.

Prosport.Az xəbər verir ki, bu barədə “telegraph.bg” saytı məlumat yayıb.

Bildirilib ki, Ağdam klubu qış “transfer pəncərəsi”ndə argentinalı forvardı heyətinə qatmağa çalışıb. “Qarabağ”la yanaşı, Moskva “Lokomotiv”i və Birləşmiş Ərəb Əmirliklərinin “Şarca” klubu da 24 yaşlı futbolçunun transferində maraqlı olub.

Lakin “Beroe” rəhbərliyinin tələbi hər 3 klubu geri addım atmağa vadar edib. Belə ki, bolqarlar hücumçu üçün 2 milyon avro istəyib. Klub rəhbərliyi maksimum 100 min avroluq endirimə razı olacağını açıqlayıb. Üstəlik, oyunçunun Avropa pasportu da olmayıb. Bu səbəbdən Qodoy yaya qədər hazırkı komandasında qalmalı olub.

Qeyd edək ki, Santyaqo Qodoyun “Beroe” ilə müqaviləsi 2027-ci ilin yayına qədərdir.