Polşanın "Radomyak" klubunun baş məşqçisi Juau Enrikeş Azərbaycan millisinin hücumçusu Renat Dadaşovun transferi haqda danışıb.

Prosport.az xəbər verir ki, portuqaliyalı mütəxəssis 26 yaşlı forvardı tərifləyib:

"Fürsət düşdü və biz bundan yararlandıq. Renat bizim komandada olanlardan fərqli xüsusiyyətlərə malik hücumçudur. O, Abdul Tapsoba və ya Pedru Perottidən (hər iki futbolçu yanvarda transfer olunub – red.) fərqlidir.  Renat daha çox rəqibin cərimə meydançasında olur. Çünki güclü və döyüşkəndir".

Qeyd edək ki, bir neçə gün əvvəl Türkiyənin "Ankaragücü" klubundan ayrılan Renat Dadaşov "Radomyak"la mövsümün sonuna qədər müqavilə imzalayıb. Müqaviləyə müddətin uzadılma variantı da daxildir.

"Radomyak”da daha bir azərbaycanlı futbolçu – Rahil Məmmədov da çıxış edir.