Misli Premyer Liqasının XXIV turunun “Şamaxı” – “Turan Tovuz” oyunundan (0:1) sonra meydan sahibi komandanın baş məşqçisi Ayxan Abbasov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Oyun haqda qısa danışacağam. Biz oynadıq, onlar qələbə qazandı. 100%-lik epizodlarımızı dəyərləndirə bilmədik. “Turan Tovuz” 1 hücuma 1 qol vurdu. Növbəti oyunlara baxacağıq.

– “Turan Tovuz” oyunun təxirə salınması üçün əvvəlcədən müraciət etmişdi. Belə nəticə olacağını bilsəydiniz, “hə” deyərdiniz?
– Xeyr. Bu məsələni bilmirəm. Hakimlər və AFFA nümayəndəsi oyunun keçirilməsi üçün durumun qənaətbəxş olduğunu bildirdi. Buna razı olmalıyıq. Oyunun keçirilməsinə maneə yox idi.

– Rəqibin süni ajiotaj yaratması necə təsir etdi?
– Olan şeylərdir. Bəlkə də özlərini siğortalamaq üçün belə edirdilər. Mübarizəli oyun getdi. Düzdür, 1-2 epizod var idi ki, VAR-a gedilməli idi, amma ümumən pis idarəçilik olmadı.

– Belaydi Pusinin yerini necə doldurmağı düşünürsünüz?
– Gedişi pis oldu. Əsas oyunçumuzun getməsini istəməzdim. Belaydini Azərbaycana mən gətirmişdim. Əvvəlcə “Turan Tovuz”a, sonra “Şamaxı”ya gəldi. Buranı seçməsinə vasitəçi oldum. Pusinin yaxşı təklifləri var idi. Onu başa düşürdük, böyük məbləğ yox idi. Azərbaycandan Rusiyaya az futbolçu gedir. Onu ora qazandırmaq bizi sevindirir. Eyni zamanda klub da müəyyən qədər qazandı. Bunları düşündük. Axtarışlarımız var. İnşallah, xeyirli qərar verəcəyik.

– Cəlal Hüseynov ilə bağlı fikirləriniz nədir?
– Əla. Gələndən 2 oyun əsas heyətdə oynadı. 2 ilə yaxın idi ki, Azərbaycan çempionatında deyildi. Məşqlərdə yaxşıdır, şansı olacaq. O, önəmli oyunçularımızdandır.