17 yaşadək futbolçulardan ibarət Azərbaycan millisi (U-17) Belarusun paytaxtı Minskdə təşkil olunan İnkişaf Kubokunda 3-cü oyununu keçirib.

Prosport.Az xəbər verir ki, U-17 B qrupundakı son görüşündə Qazaxıstanın müvafiq yaş qrupundan ibarət komandası ilə qarşılaşıb. Matç Azərbaycan yığmasının 2:1 hesablı əzmkar qələbəsi ilə başa çatıb.

Qazaxıstan 36-cı dəqiqədə hesabı açsa da, "Qarabağ"ın oyunçusu Əhməd Vəliyev (57-ci dəqiqə) və "Zirə"nin futbolçusu İmran Süleymanzadə (66) qol vuraraq komandamıza növbəti 3 xalı qazandırıb. 

Bu nəticədən sonra milli komanda 6 xalla öz qrupunda ilk pilləyə yüksəlib. Qrup qalibinin adına Rusiya – İran matçından sonra aydınlıq gələcək.

İlham Yadullayevin baş məşqçisi olduğu kollektiv turnir çərçivəsində keçirdiyi ilk 2 oyunda Rusiyaya (0:3) məğlub olub, İrana (1:0) qalib gəlib.

Qeyd edək ki, fevralın 21-də həlledici görüşlər təşkil olunacaq.