Azərbaycan karatesi bu ildən etibarən sponsorsuz qalıb. Artıq Azərbaycan karateçiləri Premyer Liqa yarışlarına federasiyanın pulu ilə yollana bilmir.

İş o yerə çatıb ki, titullu karateçimiz İrina Zaretskaya Premyer Liqa yarışlarına getmək üçün öz dostları və nazirliyin vəsaiti hesabına (Gənclər və İdman Nazirliyinin Əsasnaməsinə görə, idmançılar üçün pul ancaq – dünya çempionatı, Avropa çempionatı, Avropa Oyunları, Olimpiya Oyunları kimi mötəbər yarışlar üçün ayrılmalıdır) yollanmalı olur. Bununla belə, İrina bu il qatıldığı bütün turnirlərdən medalla qayıdır, qarşılaşdığı 3 finaldan 2-də İsveçrə təmsilçisi Elena Kuiriçidən üstün olur.

Tokio Olimpiadasında Azərbaycanın 3 finalından 2-də karatenin adı varsa, Polşada keçirilən III Avropa Oyunlarında 5 medaldan 3-də karateçilərimizin imzası var. Bunların 2-si qızıldır. Güləşçilərimizin, cüdoçularımızın (fərdi yarışlarda) olmadığı bir turnirdə karateçilərin bu medallarına çox ehtiyac var.

Tural Ağalarzadə müsahibəsində düz-əməlli təlim-məşq toplanışı keçmədiklərini bildirir. Bu onu göstərir ki, karate Olimpiya idman növü proqramından çıxarıldıqdan sonra bu federasiyada maliyyə böhranı yaşanır. Bununla belə, kumite üzrə yarışlarda məhz Azərbaycan karateçiləri Avropa Oyunlarına ən çox lisenziya qazanan ölkə oldu.

Azərbaycan karate millisi İspaniya ilə birgə (ispaniyalılar Azərbaycanın yarışmadığı katanın hesabına 2 qızıl medal qazanıb) Avropa Oyunlarında 2 qızıl və 1 bürünc medal qazanmaqla Ukraynadan sonra 2-ci oldu. Ukrayna yalnız 1 gümüş medalın hesabına medal sıralamasına başçılıq edir. Azərbaycan karatesinin bu göstəricisi Minskdə keçirilmiş II Avropa Oyunlarındakı nəticədən daha yaxşıdır. Həmin vaxt 5 medal olsa da, əyara görə (1 qızıl, 3 gümüş, 1 bürünc) Azərbaycan ilk "3-lük"dən kənarda qalmış və 4-cü olmuşdu. 

İndi siz deyin. Karate qeyri-Olimpiya idman növü olduğu üçün sambonun vəziyyətini niyə yaşamalıdır? Hər federasiyada kikboksinqdə olduğu kimi, Adil Əliyev kimi sponsor olmur. Ona görə də Bakıdakı Dünya Kubokunda belə nəticə qazana bilməyən atıcılardansa (Olimpiadaya Ruslan Lunyovun ilk lisenziyanı qazanması hələ uğur demək deyil), qanımıza döyüş növlərinin hopduğu karateyə sponsor tapmaq düzgün olmazmı?

Axı, Azərbaycan beşqat dünya çempionu Rafael Ağayev kimi idmançı yetişdirmiş ölkədir. Karateyə tezliklə sponsor tapılmalıdır! Karatemizi yaşadaq!

Səbuhi Musa