Ukraynalı futbol mütəxəssisi Aleksandr Sopko yerli məşqçilər barədə maraqlı fikirlər səsləndirib.

Prosport.Az xəbər verir ki, 66 yaşlı mütəxəssis Ukrayna mətbuatına açıqlamasında həmyerliləri arasında hələ də yüksək səviyyəli mütəxəssis olmadığını düşünür.

Məşqçilərin işinin ölkə xaricindəki nəticələrlə ölçüldüyünü bildirən Slovakiyanın “Zemplin” klubunun sabiq baş məşqçisi Azərbaycanda fəaliyyət göstərmiş mütəxəssislərə yüksək qiymət verməyib: “Məşqçilik ustalığının ölçüsü avrokuboklardakı nəticələrdir. Ona görə də məşqçilərimizin xaricdə işləməyə nə dərəcədə hazır olduqlarını söyləmək çətindir. Qazaxıstan, Özbəkistan və Azərbaycan istisna olmaqla, bizim məşqçilərə tələbat yoxdur. Mən adlarını sadaladığım ölkələrə səfərləri böyük uğur hesab etmirəm. Təəssüf ki, ölkəmizdən xaricdə uğurla işləyən məşqçi yoxdur”.

Qeyd edək ki, ukraynalı Roman Qriqorçuk yayda “Neftçi”nin baş məşqçisi təyin olunsa da, oktyabrda istefaya göndərilib.