"Önəmli qələbə idi. Çoxdandır ki, bunu istəyirdik. Son 4 matçda komandadan oyun baxımından çox razı qalmışdım. Bu gün də qələbəyə layiq idik. Çoxlu qol epizodlarımız oldu. 2-ci hissədə daha diqqətli olduq. Çox sevinirəm ki, gənc futbolçular inkişaf edir. Onları Azərbaycan futboluna qazandıqmaq istəyirik. Qışdan sonra çox çətin olacaq. Hər kəs güclənir. Biz də çalışacağıq ki, fasilədə güclənək. Yaxşı təlim-məşq toplanışı keçib qışdan sonrakı oyunlara hazırlaşacağıq".
Prosport.Az xəbər verir ki, bu sözləri "Şamaxı"nın baş məşqçisi Ayxan Abbasov Misli Premyer Liqasının XVIII turunun "Şamaxı" ilə matçından (3:1) sonra keçirilmiş mətbuat konfransında danışıb.
O, jurnalistlərin suallarını da cavablandırıb.
– Qış toplanışı ilə bağlı planınız necədir?
– Bakıda olacağıq. "Zirə" və "Sabah"la yoxlama oyunu keçirəcəyik. Vaxt azdır. Futbolçular yorğunluğu atmalıdır. 2 həftəlik hazırlığı yaxşı keçəcəyik.
– Mövsümün əvvəlində qışa qədər neçə xal toplamağı planlaşdırmışdınız?
– Minimum və maksimum var idi. Minimum 15, maksimum 20 xal düşünürdük. Amma bu aşağı da ola bilərdi, yuxarı da. Bəzi oyunlarda istədiyimizi ala bilmədik. Çempionatda gözlənilməz hallar olur, Premyer Liqamız gərgin keçir. Heç kim "Neftçi"nin ilk "3-lük"də olmayacağını gözləmirdi. Ötən mövsüm "Qəbələ"nin Premyer Liqanı tərk etməsi sürpriz oldu. Topladığımız xal Premyer Liqada qalmaq üçün hələ ki pis deyil.
– Vasili Berezutskiyə ilk məğlubiyyəti yaşatdınız. Bu haqda nə deyə bilərsiniz?
– Hansısa məşqçiyə qarşı xüsusi hazırlaşmıram. Bura təcrübəli məşqçilər gəlib baş çıxara bilməyib. Berezutski üçün Premyer Liqamız yaxşı təcrübədir. Murad Musayev Azərbaycanda böyük təcrübə topladı. Nuri Şahinə baxın, Türkiyədə çalışdı, indi Dortmund "Borusiya"sının baş məşqçisidir. Berezutski üçün burada çalışmaq faydalı olacaq.
– Adil Nağıyevlə Giorgi Kantarianın ayrılığı komandanın oyununa müsbət təsir edib?
– Gənclərə şans verdik. Onlar 4 oyunun hamısını yaxşı keçirdi. "Səbail"ə məğlubiyyətdən sonra komandada eniş oldu. Bunun səbəblərindən biri o idi ki, cəzalı və zədəli oyunçularımız çox idi. Həmin matçlarda gənclər təcrübə qazandı. Məni sevindirən odur ki, komanda sona qədər vuruşur. Onların yerində oynayan futbolçular özlərini yaxşı göstərdi.