"Turan Tovuz" Misli Premyer Liqasının XVIII turunda doğma meydanda "Neftçi" ilə 1:1 hesablı heç-heçə edib.

Prosport.Az xəbər verir ki, qərb təmsilçisinin baş məşqçisi Qurban Berdiyev matçdan sonra keçirilən mətbuat konfransında jurnalistlərin suallarını cavablandırıb:

– 2 fərqli hissə izlədik. İlk yarıda oyunçularım çox həyəcanlandı, lazım olan aqressiyanı göstrərə bilmədilər. 2-ci hissədə daha aktiv və aqressiv oynadıq. 2-ci yarıda oyundan razı qaldım. Futbolçular aktiv idi, yaxşı oynayırdılar deyə əvəzetmə etmədim. Son dəqiqələrdə zədəsi olmasına baxmayaraq, Roderik Milleri oyuna buraxdıq. O da özünü yaxşı göstərdi.

– Ayxan Hüseynovun son vaxtlar oynamamasının səbəbi nədir?
– Kimin oynamasının fərqi yoxdur. Kim yaxşıdırsa, onu da meydana buraxırıq. Meydanda olanlar yaxşı oynadığı üçün bu gün dəyişiklik etmədim.

– Qış fasiləsinə 3-cü yerdə yollandınız. Nəticəni necə hesab edirsiniz?
– Mövsümün əvvəlində bunu məndən soruşsaydılar, deyərdim ki, yaxşı nəticədir. Amma elə oyunlar oldu ki, lazımsız xallar itirdik.