"Maraqlı və gərgin oyunun şahidi olduq. Komandamdan çox razıyam. İlin son oyunudur. Bu istəklə oynamaq məni sevindirir. İnanıram ki, bu istəklə, bu oyunla yaxşı işlər görə bilərik".

Prosport.Az xəbər verir ki, bu sözləri "Sumqayıt"ın baş məşqçisi Vaqif Cavadov Misli Premyer Liqasının XVIII turunun "Kəpəz"lə oyunundan (0:0) sonra keçirilmiş mətbuat konfransında deyib. O, jurnalistlərin suallarını da cavablandırıb.

- İlk yarıda "Sumqayıt" inamlı təsir bağışlamırdı. Fasilədə nəyi dəyişdiniz?

- Oyunun əvvəlində futbolçularda özünəinam az idi. Amma buna baxmayaraq yaxşı hücumlarımız oldu. Futbol oynaya bilirik, komanda hücuma çıxmağı bacarır. Sadəcə, son nöqtəni qoya bilmədik. Meydança amili, ilin son matçının olması da təsir edə bilər. Ümumi götürəndə komandadan razıyam. Futbolçularıma təşəkkür edirəm.

- Bir neçə futbolçunuzun adı "Neftçi" ilə hallanır. Bu, sizi narahat etmir?

- Komandadan futbolçu gedirsə, bu, hər məşqçini narahat edə biər. Amma futboldur. Müqaviləsi bitən futbolçuların gedişinə normal baxmalıyıq. Biz də kimlərisə transfer edirik. "Neftçi" kimi komandanın bizim oyunçuları istəməsi xoşdur. Hər futbolçumuzun arxasındayıq. Onların heç birinin gedişini istəmirik.

- Gənc futbolçuları icarəyə verəcəksiniz?

- Elə də geniş heyətimiz yoxdur ki, kimlərisə icarəyə göndərək. Amma bəziləri gedə bilər. Mən "Sumqayıt"da olduğum müddətdə futbolçuların inkişafı üçün onlara hər cür kömək edəcəm.