"Juninyuya rəsmi təklif göndərilib".

Prosport.Az xəbər verir ki, bunu "Qarabağ" klubunun direktoru Əmrah Çəlikəl Türkiyənin "Beinsports" kanalına müsahibəsində "Sebiya"nın Juninyonu transfer etmək istəməsi haqda danışarkən deyib.

Klub rəsmisi İspaniya klubu ilə danışıqların davam edəcəyini bildirib: "Danışıqların ilkin mərhələsində razılığa gələ bilmədik. Lakin danışıqların davamı olacaq. "Sebiya" həqiqətən bu transferi həyata keçirmək istəyirsə, bizim də maraqlarımızı nəzərə almalıdır. Qış fasiləsində Juninyu kimi forvard tapmaq asan olmaz. Lakin istəyərdik ki, Azərbaycandan hansısa futbolçu La Liqada çıxış etsin".

Əmrah Çəlikəl həmçinin "Qarabağ"ın baş məşqçisi Qurban Qurbanova Türkiyə və Avropa klublarından təklif gəldiyini, lakin onun Ağdam təmsilçisindən ayrılmaq istəmədiyini bildirib: "Türkiyə klubları baş məşqçimizlə görüşmək istəyib. Amma Qurban Qurbanov klubdan ayrılmaq istəməyib. "Qarabağ"ın mənəvi yeri var. Qurban Qurbanov Vətəninə, bayrağına çox bağlı olan insandır. 2008-ci ildən baş məşqçimizlə birlikdəyik və ayrılıq əsla müzakirə mövzusu olmayıb. Biz də sonradan eşitmişik ki, Avropa klubları onunla görüşmək istəyib. Lakin Qurban Qurbanov onlara konkret cavab verib".

Qeyd edək ki, ötən ilin yayında Portuqaliyanın "Şaviş" klubundan 450 min avroya alınmış Juninyu üçün "Qarabağ" 5 milyon avro pul istəyir. "Sebiya" isə ilkin olaraq təxminən 3 milyon avro təkliflə çıxış edib.